ราชา ตสฺส กถํ สุตฺวา อตฺตมโน หุตฺวา สาธุ จินฺเตตฺวา กเถถ อกเถนฺเต ปพฺพาเชสฺสามีติ ตชฺเชสิเยว ฯ เต จตฺตาโรปิ ปณฺฑิตา ปาสาทา โอตรึสุ ฯ เสนโก อิตเร อาห ราชา สุขุมปญฺหํ ปุจฺฉิ อกถิเต มหนฺตํ ภยํ อุปฺปชฺชิสฺสติ ตสฺมา สปฺปายโภชนํ ภุญชิตฺวา ตํ ปญฺหํ สมฺมา อุปธาเรถาติ ฯ อตฺตโน อตฺตโน เคหํ คตา ฯ ปณฺฑิโตปิ อุฏฺฐาย อุทุมฺพราเทวิยา สนฺติกํ คนฺตฺวา เทวิ อชฺช วา หิยฺโย วา ราชา กตฺถ จิรํ อฏฺฐาสีติ ปุจฺฉิ ฯ หิยฺโย ตาต ทีฆนฺตเร วาตปาเนน โอโลเกนฺโก จงฺกมตีติ ฯ ตโต โพธิสตฺโต จินฺเตสิ รญฺญา อิมินา ปสฺเสน กิญฺจิ ทิฏฺฐํ ภวิสฺสตีติ ฯ ตตฺถ คนฺตฺวา พหิ โอโลเกนฺโต เอฬกสุนขานํ กิริยํ ทิสฺวา อิเม เทฺว ทิสฺวา รญฺญา ปญฺโห อภิสํขโตติ สนฺนิฏฺฐานํ กตฺวา เคหํ คโต ฯ อิตเรปิ ตโย จินฺเตตฺวา กิญฺจิ อทิสฺวา เสนกสฺส สนฺติกํ อคมํสุ ฯ เสนโก เต ทิสฺวา ปุจฺฉิ ทิฏฺโฐ โว ปญฺโหติ น ทิฏฺโฐ อาจริยาติ วุตฺเต ยทิ เอวํ ราชา โว รฏฺฐา ปพฺพาเชสฺสติ กึ

กริสฺสถาติ ตุมฺเหหิ ปน ทิฏฺโฐติ วุตฺเต อหมฺปิ น ปสฺสามีติ ตุมฺเหสุ อปสฺสนฺเตสุ มยํ กึ ปสฺสิสฺสาม หิยฺโย มยํ รญฺโญ ปน สนฺติเก จินฺเตตฺวา กเถสฺสามาติ สีหนาทํ นทิตฺวา อาคตมฺหา อิทานิ อมฺเห อกถิเต ราชา กุชฺฌิสฺสติ กึ กโรมาติ วุตฺเต อยํ ปญฺโห น สกฺกา อมฺเหหิ ทฏฺฐุํ ปณฺฑิเตน สตคุณํ กตฺวา จินฺติโต ภวิสฺสตีติ เอถ ตสฺส สนฺติกํ คจฺฉามาติ ฯ เต จตฺตาโร ปณฺฑิตา โพธิสตฺตสฺส ฆรทฺวารํ คนฺตฺวา อาคตภาวํ อาโรจาเปตฺวา เคหํ ปวิสิตฺวา ปฏิสนฺถารํ กตฺวา เอกมนฺตํ นิสินฺนา ปณฺฑิตํ ปุจฺฉึสุ กึ ปณฺฑิต จินฺติโต เต ปญฺโหติ ฯ มยิ อจินฺเตนฺเต อญฺโญ โกจิ จินฺเตสฺสติ อาม จินฺติโตติ ฯ เตนหิ อมฺหากมฺปิ กเถถาติ วุตฺเต ปณฺฑิโต สจาหํ เอเตสํ น กเถสฺสามิ ราชา เตสํ กุทฺโธ รฏฺฐา ปพฺพาเชสฺสติ มํ สตฺตหิ รตเนหิ ปูเชสฺสติ อิเม พาลา มา นสฺสนฺตุ กเถสฺสามิ เนสนฺติ จินฺเตตฺวา เต จตฺตาโร นีจาสเน นิสีทาเปตฺวา อญฺชลึ ปคฺคณฺหาเปตฺวา รญฺญา ทิฏฺฐภาวํ อชานาเปตฺวา รญฺญา ปุจฺฉิตกาเล เอวํ พฺยากเรยฺยาถาติ จตุนฺนมฺปิ จตสฺโส คาถาโย พนฺธิตฺวา ปาลิเมว อุคฺคณฺหาเปตฺวา อุยฺโยเชสิ ฯ เต ทุติยทิวเส ราชูปฏฺฐานํ คนฺตฺวา ปญฺญตฺตาสเน นิสีทึสุ ฯ ราชา เสนกํ ปุจฺฉิ ญาโต เต เสนก ปญฺโหติ มหาราช มยิ อชานนฺเต อญฺโญ โกจิ ชานิสฺสตีติ ฯ เตนหิ กเถหีติ ฯ สุณาถ เทวาติ อุคฺคหิตนิยาเมเนว คาถมาห