เสนโก ตํ สุตฺวา อชานนฺโต กึ หนฺติ กึ หนฺตีติ ตํ ตํ วิลปิตฺวา เนวสฺส อนฺตํ น โกฏึ ปสฺสติ ฯ เสสาปิ ตโย ชนา อปฺปฏิภานาว อเหสุํ ฯ ราชา วิปฏิสารี หุตฺวา ปุน รตฺติภาเค เทวตาย ปญฺโห เต ญาโตติ ปุฏฺโฐ เทวเต จตฺตาโรปิ ปณฺฑิตา เม ปุฏฺฐา เตปิ น ชานึสูติ อาห ฯ เทวตา กินฺเต ชานิสฺสนฺติ ฐเปตฺวา มโหสถปณฺฑิตํ อญฺโญ โกจิ เอเต กเถตุํ สมตฺโถ นาม นตฺถิ สเจ ตํ ปกฺโกสาเปตฺวา เอเต ปณฺเห กถาเปสิ อิจฺเจตํ กุสลํ โน เจ ตํ ปกฺโกสาเปตฺวา เอเต กถาเปสฺสสิ อิมินา ชลเตน อยกูเฏน สีสนฺเต ภินฺทิสฺสามีติ ราชานํ ตชฺเชตฺวา มหาราช อคฺคินา อตฺเถ สติ ขชฺโชปนกํ ธมิตุํ น วฏฺฏติ ขีเรน วา อตฺเถ สติ โควิสาณํ ทูหิตุํ น วฏฺฏตีติ วตฺวา อิมํ ปญฺจกนิปาเต ขชฺโชปนกปญฺหํ อุทาหริตฺวา คาถมาห

โก นุ สนฺตมฺหิ ปชฺโชเต อคฺคิปริเยสนํ จรํ

อทฺทกฺขิ รตฺตึ ขชฺโชตํ ชาตเวทํ อมญฺญถ

สฺวาสฺส โคมยจุณฺณานิ อภิมตฺถํ ติณานิ จ