มนฺเตหิ อตฺถํ ปริปาจยิตฺวา

วิชิมฺหิสฺสํ สีหวิชิมฺหิตานิ

ตายิทฺธิยา ทกฺขสิ มํ ปุนาปีติ ฯ

ตตฺถ ทุกฺเขนาติ อิมินา กายิกเจตสิกทุกฺเขน อตฺตโน โปราณกสุขํ ปฏิปากติกการเณน ปริปาเจนฺโต วฑฺเฒนฺโต ฯ กาลากาลนฺติ อยํ ปฏิจฺฉนฺนสฺส หุตฺวา วิจรณกาโล อยํ อปฏิจฺฉนฺนสฺสาติ เอวํ กาลญฺจ อกาลญฺจ วิจินนฺโต รญฺโญ กุทฺธกาเล ฉนฺเนน วิจริตพฺพนฺติ ญตฺวา ฉนฺเทน อตฺตโน รุจิยา ฉนฺโน ปฏิจฺฉนฺโน หุตฺวา กุมฺภการกมฺเมน ชีวนฺโต อตฺตโน อตฺถสฺส การณสํขาตานิ ทฺวารานิ อปาปุเรนฺโต วิวราเปนฺโต วิหรามิ เตน การเณนาหํ ยโวทเนน ตุสามีติ อตฺโถ ฯ อภิชิมฺหตายาติ อภิชิมฺหนาย อภิวิริยกรณสฺส ฯ มนฺเตหิ อตฺถํ ปริปาจยิตฺวาติ อตฺตโน ญาเณน มม ยสํ ปุน วฑฺเฒตฺวา มโนสิลาตเล สีโห วิย วิชิมฺหิสฺสํ ตาย อิทฺธิยา ปุนปิ ตฺวํ มํ ปสฺสสีติ ฯ