เอวํ วุตฺเต ราชา มหาสตฺตํ สมุสฺสิตเสตจฺฉตฺเต ราชปลฺลงฺเก นิสีทาเปตฺวา สยํ นีจาสเน นิสีทิตฺวา อาห ปณฺฑิต ฉตฺเต อธิวฏฺฐา เทวตา มํ จตฺตาโร ปญฺเห ปุจฺฉิ เต ปน เนวาหํ ชานามิ จตฺตาโร ปณฺฑิตาปิ น ชานึสุ ตสฺมา กเถหิ เม ตาต เต ปญฺเหติ ฯ มหาราช ฉตฺเต อธิวฏฺฐา เทวตาว โหตุ จาตุมฺมหาราชิกาทโย วา เทวา โหนฺตุ เยน เกนจิ ปุฏฺฐํ ปญฺหํ อหํ กเถตุํ สกฺโกมิ วท มหาราช เทวตาย ปุจฺฉิตปญฺเหติ ฯ อถ ราชา เทวตาย ปุจฺฉิตนิยาเมเนว กเถนฺโต ปฐมํ คาถมาห

หนฺติ หตฺเถหิ ปาเทหิ มุขญฺจ ปริสุมฺภติ

สเว ราช ปิโย โหติ กนฺเตนมภิปสฺสสีติ ฯ

ตตฺถ หนฺตีติ ปหรติ ฯ ปริสุมฺภตีติ ปหรติเยว ฯ สเว ราช ปิโย โหตีติ โส เอวํ กโรนฺโต ปิโย โหติ ฯ กนฺเตนมภิปสฺสสีติ เตน การเณน ปิโย โหติ กตรํ ปุคฺคลํ ตฺวํ ราช ปสฺสสีติ ฯ เอวํ ตํ เทวตา ปญฺหํ ปุจฺฉิ ฯ