มหาสตฺตสฺส กถํ สุตฺวาว คคณตเล ปุณฺณจนฺโท วิย ตสฺสตฺโถ ปากโฏว โหติ ฯ อถสฺส มหาสตฺโต สุณ มหาราชาติ วตฺวา มหาราช ยทา มาตุองฺเก นิปนฺโน ทหรกุมาโร หฏฺฐตุฏฺโฐ กีฬนฺโต มาตรํ หตฺถปาเทหิ ปหรติ เกเส จ ลุญจฺติ มุฏฺฐินา มุขํ จ ปหรติ ตทา นํ สา โภ ทุฏฺฐ โจร ปุตฺต กึ ตฺวํ โน เอวํ ปหรสีติ อาทีนิ เปมวเสเนว วตฺวา เปมํ สนฺธาเรตุํ อสกฺโกนฺตี อาลิงฺคิตฺวา ถนนฺตเร นิปชฺชาเปตฺวา สีสํ ปริจุมฺพติ ฯ อิติ ตสฺสา เอวรูเป กาเล มหาราช ปิยตโร โหติ ตถา ปิตุโนติ เอวํ คคณมชฺเฌ สุริยํ อุกฺขิปนฺโต วิย ปากฏํ ปญฺหํ กตฺวา กเถสิ ฯ ตํ สุตฺวา เทวตา ฉตฺตปิณฺฑิกวิวรโต นิกฺขมิตฺวา อุปฑฺฒสรีรํ ทสฺเสนฺตี อโห วต สุกถิโต ปณฺฑิเตน ปญฺโหติ มธุรสฺสเรน สาธุการํ ทตฺวา รตนจงฺโกฏกํ ปูเรตฺวา ทิพฺพปุปฺผคนฺเธหิ มหาสตฺตํ ปูเชตฺวา อนฺตรธายิ ฯ ราชาปิ มหาสตฺตํ ปุปฺผาทีหิ ปูเชตฺวา อิตรํ ปญฺหํ ยาจิตฺวา วท มหาราชาติ วุตฺเต ทุติยํ คาถมาห

อกฺโกสติ ยถากามํ อาคมญฺจสฺส เนจฺฉติ

สเว ราช ปิโย โหติ กนฺเตนมภิปสฺสสีติ ฯ

อถ มหาสตฺโต มหาราช มาตา วจนเปสนํ กาตุํ สมตฺถํ สตฺตฏฺฐวสฺสิกํ ปุตฺตํ ตาต เขตฺตํ คจฺฉ อนฺตราปณํ คจฺฉาติ อาทีนิ วตฺวา เปเสสิ กุมาโร อมฺม สเจ เม อิทญฺจิทญฺจ ขาทนียํ โภชนียํ ทสฺสสิ คมิสฺสามีติ วตฺวา คณฺห ตาตาติ วุตฺเต ตํ ขาทิตฺวา มุขํ วิกฺขาเลตฺวา ฆรทฺวาเร อฏฺฐาสิ เขตฺตํ อคนฺตฺวาว ทารเกหิ สทฺธึ กีฬนฺโต มาตุ เปสนกมฺมํ อกตฺวา คจฺฉ ตาตาติ วุตฺเต อมฺม ตฺวํ สีตาย ฆรจฺฉายาย นิสีทิตฺวา ฐิตา อหํ ตว กถํ พหิ เปสนกมฺมํ กริสฺสามีติ อาทีนิ วตฺวา ตฺวํ มํ วญฺเจสีติ วุตฺเต มาตุยา หตฺถวิการมุขวิกาเร ทสฺเสตฺวา ปลายิ มาตา ปลายนฺตํ ทิสฺวา กุปฺปิตา ทณฺฑกํ คเหตฺวา อนุพนฺธิตฺวา ตํ ปาปุณิตุํ อสกฺโกนฺตี อเร ทุฏฺฐ โจร ปุตฺต ตฺวํ มม สนฺตกํ ขาทิตฺวา เขตฺเต กิญฺจิ กาตุํ น อิจฺฉสิ ติฏฺฐ ติฏฺฐาติ ตชฺเชนฺตี คจฺฉ ตฺวํ อเร โจรา ตํ ขณฺฑาขณฺฑิกํ ฉินฺทนฺตูติ อาทีนิ วตฺวา ยถากามํ ยถาอชฺฌาสยํ อกฺโกสติ ปริภาสติ ยทา ปน มุเขน ภณติ ตโต หทเยน อปฺปมตฺตกสฺสาปิ อาคมนญฺจสฺส น อิจฺฉติ ทารโกปิ ทิวสภาคํ ทารเกหิ สทฺธึ กีฬิตฺวา สายํ เคหํ ปวิสิตุํ อวิสหนฺโต ญาตกานํ สนฺติกํ คจฺฉติ มาตาปิสส อาคมนมคฺคํ โอโลเกนฺตี ตํ อนาคจฺฉนฺตํ ปิยปุตฺตํ ทิสฺวา ปวิสิตุํ น วิสหติ มญฺเญติ โสเกน หทยํ ปูเรตฺวา อสฺสุปุณฺเณหิ เนตฺเตหิ ญาติฆเร อุปธาเรนฺตี ปิยปุตฺตํ ทิสฺวา อาลิงฺคิตฺวา สีเส จุมฺพิตฺวา อุโภหิ หตฺเถหิ ทฬฺหํ คเหตฺวา ตาต ปิยปุตฺต มา มม วจนํ หทเยปิ ฐเปสีติ วตฺวา อติเรกตรํ เปมํ อุปฺปาเทสิ เอวํ มหาราช มาตุยา ปุตฺโต กุทฺธกาเล ปิยตโร นาม โหตีติ วตฺวา ทุติยํ ปณฺหํ กเถสิ ฯ เทวตา ตเถว ปูเชติ ฯ ราชาปิ ตเถว ตํ ปูเชตฺวา ตติยํ ปณฺหํ ยาจิตฺวา วท มหาราชาติ วุตฺเต ตติยํ คาถมาห