มหาราช มหนฺโต อุลฺโลลสทฺโท น โข ปน ชานาม กินฺนาเมตํ วีมํสิตุํ วฏฺฏติ มหาราชาติ อาหํสุ ฯ ตํ สุตฺวา ราชา พฺรหฺมทตฺโต อาคโต ภเวยฺยาติ สีหปญฺชรํ วิวริตฺวา โอโลเกนฺโต ตสฺสาคตภาวํ ญตฺวา ภีตตสิโต นตฺถิมฺหากํ ชีวิตํ เสฺวทานิ สพฺเพ โน ชีวิตกฺขยํ ปาเปสฺสตีติ เตหิ สทฺธึ สลฺลปนฺโต นิสีทิ ฯ มหาสตฺโต ปน ตสฺสาคตภาวํ ญตฺวา สีโห วิย อสมฺภีโต สกลนคเร อารกฺขํ สํวิทหิตฺวา ราชานํ อสฺสาเสสฺสามีติ จินฺเตตฺวา ราชนิเวสนํ อภิรุหิตฺวา ราชานํ วนฺทิตฺวา เอกมนฺตํ อฏฺฐาสิ ฯ ตํ ทิสฺวา ปฏิลทฺธสฺสาโส หุตฺวา ฐเปตฺวา มม ปุตฺตํ มโหสถปณฺฑิตํ อญฺโญ มํ อิมมฺหา ทุกฺขา โมเจตุํ สมตฺโถ นาม นตฺถีติ จินฺเตตฺวา เตน สทฺธึ สลฺลปนฺโต อิมสฺมึ มหาอุมฺมงฺคชาตเก ปฐมคาถมาห

ปญฺจาโล สพฺพเสนาย พฺรหฺมทตฺโต สมาคโต

สายํ ปญฺจาลิยา เสนา อปฺปเมยฺยา มโหสถ

วิทฺธิมตี ปตฺติมตี สพฺพสงฺคามโกวิทา