พฺรหฺมทตฺตสฺสาปิ เตหิ ราชูหิ สทฺธึ อุตฺตรปญฺจาลนคเร วสนฺตสฺส เอกวสฺสํ อตีตํ ฯ

อเถกทิวสํ เกวฏฺโฏ อาทาเสน มุขํ โอโลเกนฺโต นลาเต วณํ ทิสฺวา อิทํ คหปติปุตฺตสฺส กมฺมํ เตนาหํ เอตฺตกานํ ราชูนํ อนฺตเร ลชฺชาปิโตติ จินฺเตตฺวา สมุปฺปนฺนโกโธ หุตฺวา กทา นุ ขวสฺส ปิฏฺฐึ ปสฺสิตุํ สมตฺโถ ภวิสฺสามีติ จินฺเตนฺโต อตฺเถโส อุปาโย อมฺหากํ รญฺโญ ธีตา ปญฺจาลจนฺที นาม อุตฺตมรูปธรา เทวจฺฉรปฏิภาคา ตํ วิเทหสฺส รญฺโญ ทสฺสามาติ วตฺวา วิเทหํ กาเมน ปโลเภตฺวา คิลิตพลิสํ วิย มจฺฉํ มโหสถปณฺฑิเตน สทฺธึ วิเทหํ อาเนตฺวา อุโภปิ เต มาเรตฺวา ชยปานํ ปิวิสฺสามาติ สนฺนิฏฺฐานํ กตฺวา ราชานํ อุปสงฺกมิตฺวา อาห เทว เอโก มนฺโต อตฺถีติ ฯ ตสฺส วจนํ สุตฺวา ราชา อาริย ตว มนฺตํ นิสฺสาย อุทรสาฏกสฺสาปิ สามิโน น ชาตมฺหา อิทานิ กึ กริสฺสสิ ตุณฺหี โหหีติ อาห ฯ มหาราช อิมินา อุปาเยน สทิโส อญฺโญ อุปาโย นตฺถีติ ฯ เตนหิ ภณาหีติ ฯ มหาราช อมฺเหหิ ทฺวีหิเยว ภวิตุํ วฏฺฏตีติ ฯ เอวํ โหตูติ ฯ อถ นํ พฺราหฺมโณ อุปริปาสาทตลํ อาโรเปตฺวา สยนคพฺภํ ปเวเสตฺวา อาห มหาราช วิเทหราชานํ กิเลเสน ปโลเภตฺวา อิธาเนตฺวา คหปติปุตฺเตน สทฺธึ มาเรสฺสามาติ ฯ เอโส สุนฺทโร อาจริย อุปาโย กถํ ปน ตํ ปโลเภตฺวา อาเนสฺสามาติ ฯ มหาราช ธีตา โว ปญฺาจาลจนฺที อุตฺตมรูปธรา ตสฺสา รูปสิริสมฺปตฺติญฺจ จาตุริยวิลาสญฺจ กวีหิ คีตพนฺธเนน พนฺธาเปตฺวา ตานิ กาพฺยานิ มิถิลายํ คายาเปตฺวา เอวรูปํ อิตฺถีรตนํ อลภนฺตสฺส วิเทหนรินฺทสฺส กึ รชฺเชนาติ ตสฺส สวนสํสคฺเคเนว ปฏิพทฺธภาวํ ญตฺวา อหํ ตตฺถ คนฺตฺวา ทิวสํ ววฏฺฐเปสฺสามิ โส มยิ ทิวสํ ววฏฺฐเปตฺวา อาคเต คิลิตพลิโส วิย มจฺโฉ คหปติปุตฺตํ คเหตฺวา อาคมิสฺสติ อถ เน มาเรสฺสามาติ ฯ ราชา ตสฺส วจนํ สุตฺวา ตุสิตฺวา โสภโน เต อาจริย อุปาโย เอวํ กริสฺสามาติ สมฺปฏิจฺฉิ ฯ ตํ ปน มนฺตํ จูฬนีพฺรหฺมทตฺตสฺส สยนปาลิกา สาลิกา สกุณิกา สุตฺวา ปจฺจกฺขํ อกาสิ ฯ ราชา โปราณกาพฺยการเก ปกฺโกสาเปตฺวา พหุธนํ ทตฺวา ธีตรํ เตสํ ทสฺเสตฺวา ตาตา เอติสฺสา รูปสมฺปตฺตึ นิสฺสาย กาพฺยํ กโรถาติ อาห ฯ เต อติมโนหรานิ คีตานิ พนฺธิตฺวา ราชานํ สาวยึสุ ฯ ราชา เตสํ พหุธนํ อทาสิ ฯ กวีนํ สนฺติกา กาพฺยานิ นาฏกิตฺถิโย สิกฺขาเปตฺวา สมชฺชมณฺฑเล คายึสุ ฯ อิติ ตานิ คีตานิ วิตฺถาริตานิ อเหสุํ ฯ เตสุ มนุสฺสานํ อนฺตเร วิตฺถาริตตฺตํ คเตสุ ราชา คายเก ปกฺโกสาเปตฺวา อาห ตาตา ตุมฺเห มหาสกุเณ คเหตฺวา รตฺตึ รุกฺขํ อภิรุยฺห ตตฺถ นิสินฺนา คายิตฺวา ปจฺจูสกาเล เตสํ คีวาสุ กํสตาเล พนฺธิตฺวา เต อุฏฺฐาเปตฺวา โอตรถาติ ฯ โย กิร อากาเส กํสตาลสทฺทํ สุตฺวา โส ปณฺจาลรญฺโญ ธีตุ สรีรวณฺณํ เทวตาโยปิ คายนฺตีติ ปากฏภาวกรณตฺถํ ตถา กาเรสิ ฯ ปุน ราชา เต กวิโย ปกฺโกสาเปตฺวา ตาตา อิทานิ ตุมฺเห เอวรูปา กุมาริกา ชมฺพูทีปตเล อญฺญสฺส รญฺโญ นานุจฺฉวิกา มิถิลายํ วิเทหรญฺโญ อนุจฺฉวิกา รญฺโญ อิสฺสริยญฺจ อิมาย เอวานุจฺฉวิกนฺติ วณฺเณตฺวา คีตานิ พนฺธถาติ อาห ฯ เต ตถา กตฺวา รญฺโญ อาโรจยึสุ ฯ ราชา เตสํ ธนํ ทตฺวา ตาตา มิถิลํ คนฺตฺวา ปุน ตตฺถ อิมินาว อุปาเยน คายถาติ เปเสสิ ฯ เต ตานิ คายนฺตา อนุปุพฺเพน มิถิลํ ปตฺวา สมชฺชมณฺฑเล คายึสุ ฯ ตานิ สุตฺวา มหาชโน อุกฺกุฏฺฐิสหสฺสานิ ปวตฺเตตฺวา เตสํ พหุธนํ อทาสิ ฯ เต รตฺติสมเย รุกฺเขสุ คายิตฺวา ปจฺจูสกาเล สกุณานํ คีวาสุ กํสตาเล พนฺธิตฺวา โอตรนฺติ ฯ อากาเส กํสตาลสทฺทํ สุตฺวา ปญฺจาลรญฺโญ ธีตุ สรีรวณฺณํ เทวตาโยปิ คายนฺตีติ สกลนคเร เอกโกลาหลมโหสิ ฯ วิเทหราชา ตํ สุตฺวา กาพฺยการเก ปกฺโกสาเปตฺวา อตฺตโน นิเวสเน สมชฺชํ กาเรตฺวา เอวรูปํ กิร อุตฺตมรูปธรํ ราชธีตรํ จูฬนีราชา มยฺหํ ทาตุกาโมติ ตุสิตฺวา เตสํ พหุธนํ อทาสิ ฯ เต อาคนฺตฺวา พฺรหฺมทตฺตสฺส อาโรเจสุํ ฯ อถ นํ เกวฏฺโฏ อาห อิทานาหํ มหาราช ทิวสํ ววฏฺฐปนตฺถาย คมิสฺสามีติ ฯ โส สาธุ อาจริย กึ ลทฺธุํ วฏฺฏตีติ ฯ โถกํ ปณฺณาการํ มหาราชาติ ฯ คณฺหาหิ อาจริยาติ ทาเปสิ ฯ โส ตํ อาทาย มหนฺเตน ปริวาเรน คนฺตฺวา วิเทหรฏฺฐํ สมฺปาปุณิ ฯ ตสฺสาคมนํ สุตฺวา นคเร เอกโกลาหลํ ชาตํ จูฬนีราชา จ กิร วิเทโห จ มิตฺตสนฺถวํ กริสฺสนฺติ จูฬนีราชาปิ อตฺตโน ธีตรํ อมฺหากํ รญฺโญ ทสฺสติ เกวฏฺโฏ กิร ทิวสํ ววฏฺฐเปตุํ เอตีติ ฯ วิเทหราชาปิ ตํ สุณิ ฯ สหาสตฺโตปิ ตํ สุณิ ฯ ตํ สุตฺวานสฺส เอตทโหสิ ตสฺสาคมนํ มยฺหํ น รุจฺจติ ตตฺตโต ๑- ตํ ชานิสฺสามีติ ฯ โส จูฬนีรญฺโญ สนฺติเก อุปนิกฺขิตฺตปริสานํ สาสนํ เปเสสิ อิมมตฺถํ ตตฺตโต ชานิตฺวา สาสนํ เปเสนฺตูติ ฯ อถสฺส เต มยเมตํ ตตฺตโต น ชานาม ราชา จ เกวฏฺโฏ จ สยนคพฺเภ นิสีทิตฺวา มนฺเตนฺติ รญฺโญ ปน สยนปาลิกา สาลิกา สกุณิกา เอตํ มนฺตํ ชาเนยฺยาติ ปฏิสาสนํ เปสยึสุ ฯ ตํ สุตฺวา มหาสตฺโต จินฺเตสิ ยถา ปจฺจามิตฺตานํ โอกาโส น โหติ เอวํ สุวิภตฺตํ กตฺวา สุสชฺชิตนครํ อหํ เกวฏฏสฺส ทฏฺฐุํ น ทสฺสามีติ ฯ โส นครทฺวารโต ยาว ราชเคหา ราชเคหโต จ ยาว อตฺตโน เคหา อาคมนมคฺคํ อุโภสุ ปสฺเสสุ กิลญฺเชหิ ปริกฺขิปาเปตฺวา มตฺถเกปิ กิลญฺเชหิ ปฏิจฺฉาทาเปตฺวา จิตฺตกมฺมํ กาเรตฺวา ภูมิยํ ปุปฺผานิ วิกีริตฺวา ปุณฺณฆเฏ ฐปาเปตฺวา กทฺทลิโย จ ฐปาเปตฺวา ธเช ปคฺคณฺหาเปสิ ฯ เกวฏฺโฏ นครํ ปวิสิตฺวา สุวิภตฺตํ นครํ อปสฺสนฺโต รญฺญา เม มคฺโค อลงฺการาปิโตติ จินฺเตตฺวา นครสฺส อทสฺสนตฺถํ กตภาวํ น ชานาติ ฯ