ปญฺจาโล จ วิเทโห จ อุโภ เอกา ภวนฺตุ เตติ ฯ

ตตฺถ สนฺถวกาโม เตติ มหาราช อมฺหากํ ราชา ตยา สทฺธึ มิตฺตสนฺถวํ กตฺตุกาโม ฯ รตนานีติ อิตฺถีรตนํ อตฺตโน ธีตรํ อาทึ กตฺวา ตุมฺหากํ รตนานิ เทติ ฯ อาคจฺฉนฺตูติ อิโต ปฏฺฐาย กิร อุตฺตรปญฺจาลนครโต ปณฺณาการํ คเหตฺวา มธุรวจนา ปิยภาณิโน ทูตา อิธาคจฺฉนฺตุ อิโต จ ตตฺถ คจฺฉนฺตุ ฯ เอกา ภวนฺตูติ เต คงฺโคทกํ วิย ยมุโนทเกน สทฺธึ สํสนฺทนฺตํ เอกสทิสาว โหนฺตุ ฯ

เอวญฺจ ปน วตฺวา มหาราช อมฺหากํ ราชา อญฺญํ มหามจฺจํ เปเสตุกาโม หุตฺวาปิ รญฺโญ มนาปํ กตฺวา สาสนํ อาโรเจตุํ น สกฺขิสฺสติ ตสฺมา มํ เปเสติ อาจริย ตุมฺเห สาธุกํ ราชานํ โพเธตฺวา อาทาย อาคจฺฉถาติ คจฺฉถ ราชเสฏฺฐ อภิรูปญฺจ กุมาริกํ ลภิสฺสถ อมฺหากญฺจ รญฺญา สทฺธึ มิตฺตสนฺถโว เต ปติฏฺฐหิสฺสตีติ อาห ฯ โส ตสฺส วจนํ สุตฺวา ตุฏฺฐมานโส หุตฺวา อุตฺตมรูปธรํ กิร กุมาริกํ ลภิสฺสามีติ สวนสํสคฺเคน พชฺฌิตฺวา อาจริย ตุมฺหากญฺจ กิร มโหสถปณฺฑิตสฺส จ ธมฺมยุทฺเธ วิวาโท อโหสิ คจฺฉถ ปุตฺตํ เม ปสฺสถ อุโภปิ ปณฺฑิตา อญฺญมญฺญํ ขมาเปตฺวา มนฺเตตฺวา เอถาติ อาห ฯ ตํ สุตฺวา เกวฏฺโฏ ปสฺสิสฺสามิ ปณฺฑิตนฺติ ตํ ปสฺสิตุํ อคมาสิ ฯ มหาสตฺโตปิ ตํ ทิวสํ ตสฺส อตฺตโน สนฺติกํ อาคตภาวํ ญตฺวา จินฺเตสิ เตน เม ปาปธมฺเมน สทฺธึ สลฺลาโป มา โหตูติ ปาโตว โถกํ สปฺปึ ปิวิ ฯ เคหํปิสฺส พหเลน อลฺลโคมเยน ลิมฺเปสิ ถมฺเภ จ เตเลน มกฺเขสิ ฯ ตสฺส นิปชฺชนกํ เอกํ ปน วตฺถมญฺจกํ ฐเปตฺวา เสสานิ มญฺจปีฐานิ นีหราเปสิ ฯ โส มนุสฺสานํ สญฺญํ อทาสิ ฯ ตุมฺเห พฺราหฺมเณ กเถตุํ อารทฺเธ เอวํ วเทยฺยาถ พฺราหฺมณ มา ปณฺฑิเตน สทฺธึ กเถยฺยาสิ อชฺช เตน สปฺปิ ปีตนฺติ มยิ เตน สทฺธึ กถนาการํ กโรนฺเตปิ เทว ติขิณสปฺปิ โว ปีตํ มา กเถถาติ นิวาเรยฺยาถาติ เอวํ วิจาเรตฺวา มหาสตฺโต รตฺตปฏํ นิวาเสตฺวา สตฺตเม ทฺวารโกฏฺฐเก ปุริเส ฐเปตฺวา วตฺถมญฺจเก นิปชฺชิ ฯ เกวฏฺโฏปิสฺส ปฐเม ทฺวารโกฏฺฐเก ฐตฺวา กหํ ปณฺฑิโตติ ปุจฺฉิ ฯ อถ นํ เต มนุสฺสา พฺราหฺมณ มา สทฺทมกริ สเจปิ อาคนฺตุกาโม ตุณฺหี หุตฺวา เอหิ อชฺช ปณฺฑิเตน ติขิณสปฺปิ ปีตํ มหาสทฺทํ กาตุํ น ลภิสฺสสีติ อาหํสุ ฯ เสสทฺวารโกฏฺฐเกสุปิ นํ ตเถว อาหํสุ ฯ โส สตฺตมํ ทฺวารโกฏฺฐกํ อติกฺกมิตฺวา ปณฺฑิตสฺส สนฺติกํ อคมาสิ ฯ ปณฺฑิโต กถนาการํ ทสฺเสสิ ฯ อถ นํ มนุสฺสา เทว มา กถยิตฺถ ติขิณสปฺปิ โว ปีตํ กึ โว อิมินา ทุฏฺฐพฺราหฺมเณน สทฺธึ กถเนนาติ วตฺวา นิวารยึสุ ฯ อิติ โส ปณฺฑิตสฺส สนฺติกํ คนฺตฺวา เนว นิสีทิ ตุํ อาสนํ นิสฺสาย ฐิตฏฺฐานํปิ น ลภติ อลฺลโคมยํ อกฺกมิตฺวา อฏฺฐาสิ ฯ อถ นํ โอโลเกตฺวา เอโก อกฺขีนิ อุมฺมิลิ เอโก ภมุกํ อุกฺขิปิ เอโก กปฺปุรํ อากฑฺฒยิ ฯ เกจิ หตฺถปาทวิการาทีนิ ทสฺเสนฺติ ฯ โส เตสํ กิริยํ โอโลเกตฺวา มงฺกุภูโต คจฺฉามหํ ปณฺฑิตาติ วตฺวา อปเรหิ อเร ทุฏฺฐพฺราหฺมณ มา สทฺทมากาสิ สเจ สทฺทเมว กโรสิ อฏฺฐีนิ เต ภินฺทิสฺสามาติ วุตฺเต ภีตตสิโต หุตฺวา นิวตฺติตฺวา คจฺฉนฺโต น โอโลเกสิ ฯ อถ นํ อญฺโญ อุฏฺฐาย เวฬุเปสิกาย ปิฏฺฐิยํ ตาเฬสิ ฯ อญฺโญ ปิฏฺฐิยํ หตฺถตเลน ปหริ ฯ อนฺตเร อญฺโญ คีวายํ คเหตฺวา ขิปิ ฯ โส สีหมุขโต มุตฺตมิโค วิย ภีตตสิโต หุตฺวา นิกฺขมิตฺวา ราชเคหํ คโต ฯ ราชา จินฺเตสิ อชฺช มม ปุตฺโต อิมํ ปวุตฺตึ สุตฺวา ตุฏฺโฐ ภวิสฺสติ ทฺวินฺนํ ปณฺฑิตานํ มหติยา ธมฺมสากจฺฉาย ภวิตพฺพํ อชฺช อุโภปิ อญฺญมญฺญํ ขมาเปสฺสนฺติ ลาภาวต เมติ ฯ โส เกวฏฺฏํ ทิสฺวา ปณฺฑิเตน สทฺธึ สํสนฺทนาการํ ปุจฺฉนฺโต อิมํ คาถมาห