ตตฺถ หริตปกฺโขติ หริตปตฺตสมานปกฺโข ฯ เวยฺยาวจฺจนฺติ เอหิ สมฺมาติ วุตฺเต อาคนฺตฺวา องฺเก นิสินฺนํ สมฺม อญฺเญน มนุสฺสภูเตน กาตุํ อสกฺกุเณยฺยํ มเมกํ เวยฺยาวฏิกํ กโรหีติ อาห ฯ กึ กโรมิ เทวาติ จ วุตฺเต สมฺม เกวฏฺฏพฺราหฺมณสฺส ทูเตยฺเยน อาคตการณํ ฐเปตฺวา ราชานญฺจ เกวฏฺฏพฺราหฺมณญฺจ อญฺโญ น ชานาติ อุโภว รญฺโญ สยนคพฺเภ นิสินฺนา มนฺตยึสุ ตสฺส ปน อตฺถิ ปญฺจาลราชสฺส สาลิกา สยนปาลิกา สา กิร ตํ รหสฺสํ ชานาติ ตวํ ตตฺถ คนฺตฺวา ตาย สทฺธึ เมถุนปฏิสํยุตฺตํ วิสฺสาสํ กตฺวา เตสํ รหสฺสํ ตํ ปตฺถเรน ปุจฺฉสฺสุ ตํ สาลิกํ ปฏิจฺฉนฺเน ปเทเส ยถา ตํ โกจิ อญฺโญ น ชานาติ เอวํ ปุจฺฉสฺสุ สเจ หิ เต โกจิ สทฺทํ สุณาติ ชีวิตํ เต นตฺถิ ตสฺมา ปฏิจฺฉนฺนฏฺฐาเน สณิกํ ปุจฺฉาติ ฯ สา เนสํ สพฺพนฺติ สา เนสํ รญฺโญ จ โกสิย โคตฺตสฺส จ เกวฏฺฏสฺสาติ ทฺวินฺนมฺปิ ชนานํ สพฺพํ รหสฺสํ ชานาติ ฯ อาโมติ ภิกฺขเว โส สุวโปตโก ปณฺฑิเตน ปุริมนเยเนว สกฺการํ กตฺวา เปสิโต อาโมติ ตสฺส ปฏิสุณิตฺวา มหาสตฺตํ วนฺทิตฺวา ปทกฺขิณํ กตฺวา วิวฏสีหปญฺชเรน นิกฺขมิตฺวา วาตเวเคน สิวีรฏฺเฐ อริฏฺฐปุรํ นาม นครํ คนฺตฺวา ตตฺถ ปวุตฺตึ สลฺลกฺเขตฺวา สาลิกาย สนฺติกํ คโต ฯ กถํ ฯ โส หิ ราชนิเวสนสฺส กญฺจนถูปิกาย นิสีทิตฺวา ราคนิสฺสิตํ มธุรรวํ รวิ ฯ กึ การณา ฯ อิมํ สทฺทํ สุตฺวา สาลิกา ปฏิรวิสฺสติ ตาย สญฺญาย ตสฺสา สนฺติกํ คมิสฺสามีติ ฯ สาปิ ตสฺส สทฺทํ สุตฺวา ราชสยนสฺส สนฺติเก สุวณฺณปญฺชเร นิสินฺนา ราครตจิตฺตา หุตฺวา ติกฺขตฺตุํ ปฏิรวิ ฯ โส โถกํ คนฺตฺวา ปุนปฺปุนํ สทฺทํ กตฺวา ตาย กตสทฺทานุสาเรน อนุกฺกเมน สีหปญฺชรุมฺมาเร ฐตฺวา ปริสฺสยาภาวํ โอโลเกตฺวา ตสฺสา สนฺติกํ คโต ฯ เอตฺถ นํ สา เอหิ สมฺม สุวณฺณปญฺชเร นิสีทาหีติ อาห ฯ โส คนฺตฺวา นิสีทิ ฯ อามนฺตยีติ เอวํ โส คนฺตฺวา เมถุนปฏิสํยุตฺตํ วิสฺสาสํ กตฺตุกาโม หุตฺวา ตํ อามนฺเตสิ ฯ สุฆรนฺติ กญฺจนปญฺชเร วสนตาย สุนฺทรฆรํ ฯ เวเสติ เวสิเก เวสชาติเก ฯ อิติ สาลิกา กิร สกุเณสุ เวสชาติกา นาม เตน นํ เอวํ อาลปติ ฯ ตวาติ สุฆเร ตว วทามิ ฯ กจฺจิ เต มธุนา ลาชาติ กจฺจิ เต มธุนา สทฺธึ ลาชา ลพฺภตีติ ปุจฺฉติ ฯ กุโต นุ สมฺม อาคมฺมาติ สมฺม กุโต อาคนฺตฺวา ตฺวํ อิธ ปวิฏฺโฐสีติ ปุจฺฉติ ฯ กสฺส วาติ เกน วา เปสิโต ตวํ อิธาคโตสีติ ฯ