อตฺถิ ชมฺพาวตี นาม มาตา สิวิสฺส ราชิโน

สา ปิยา วาสุเทวสฺส กณฺหสฺส จ มเหสิยาติ ฯ

ตตฺถ ชมฺพาวตีติ สิวีรญฺโญ มาตา ชมฺพาวตี นาม จณฺฑาลี อโหสิ ฯ สา กณฺหายนโคตฺตสฺส ทสภาติกานํ เชฏฺฐกสฺส วาสุเทวสฺส ปิยา อคฺคมเหสี อโหสิ ฯ โส กิเรกทิวสํ ทฺวารวติโต นิกฺขมิตฺวา อุยฺยานํ คจฺฉนฺโต จณฺฑาลคามโต เกนจิเทว การณีเยน นครํ ปวิสนฺตึ เอกํ จณฺฑาลิกํ เอกมนฺเต ฐิตํ อภิรูปํ กุมาริกํ ทิสฺวาว ปฏิพทฺธจิตฺโต หุตฺวา กึ ชาติกาติ ปุจฺฉาเปตฺวา จณฺฑาลชาติกาติ สุตฺวาปิ ปฏิพทฺธจิตฺตตาย อสฺสามิกภาวํ ปุจฺฉาเปตฺวา อสฺสามิกาติ สุตฺวา ตํ อาทาย ตโตว นิวตฺติตฺวา นิเวสนํ เนตฺวา อคฺคมเหสึ อกาสิ ฯ สา สิวึ นาม ปุตฺตํ วิชายิ ฯ โส ปิตุ อจฺจเยน ทฺวารวติยํ รขฺชํ กาเรสิ ฯ ตํ สนฺธาเยตํ วุตฺตํ ฯ

อิติ โส อิทํ อุทาหรณํ อาหริตฺวา เอวรูโปปิ นาม ขตฺติโย จณฺฑาลิยา สทฺธึ สํวาสํ กปฺเปสิ อมฺเหสุ ติรจฺฉานคเตสุ กึ วตฺตพฺพเมว อญฺญมญฺญํ สํวาสโรจนํเยว ปมาณนฺติ วตฺวา อปรมฺปิ อุทาหรณํ อาหรนฺโต อาห