รตนวตี กึปุริสี สาปิ วจฺฉํ อกามยิ

มนุสฺสา มิคิยา สนฺติ นตฺถิ กาเม อสาทิโสติ ฯ

ตตฺถ วจฺฉนฺติ เอวํ นามกํ ตาปสํ ฯ กถํ ปน สา ตํ อกามยีติ ฯ อตีตสฺมึ เอโก พฺราหฺมโณ กาเมสุ อาทีนวํ ทิสฺวา มหนฺตํ ยสํ ปหาย อิสิปพฺพชฺชํ ปพฺพชิตฺวา หิมวนฺเต ปณฺณสาลํ มาเปตฺวา วสิ ฯ ตสฺส ปณฺณสาลโต อวิทูเร เอกิสฺสํ คุหายํ พหู กินฺนรา วสนฺติ ฯ ตตฺเถเวโก มกฺกฏโก ทฺวาเร วสติ ฯ โส เนสํ สีสํ ภินฺทิตฺวา โลหิตํ ปิวติ ฯ กินฺนรา นาม ทุพฺพลา โหนฺติ ภีรุกชาติกา ฯ โสปิ มกฺกฏโก มหา อติวิสาโล ฯ เต ตสฺส กิญฺจิ กาตุํ อสกฺโกนฺตา ตํ ตาปสํ อุปสงฺกมิตฺวา กตปฏิสนฺถารา อาคมนการณํ ปุฏฺฐา เอโก เทว มกฺกฏโก ชิวิตํ โน ปหรติ อญฺญํ ปฏิสรณํ น ปสฺสาม ตวํ ตํ มาเรตฺวา อมฺหากํ โสตฺถิภาวํ กโรหีติ อาหํสุ ฯ ตํ สุตฺวา ตาปโส อเปถ น มาทิสา ปาณาติปาตํ กโรนฺตีติ อปสาเทสิ ฯ ตาสุ รตนวตี นาม กินฺนรี อสฺสามิกา อโหสิ ฯ เต ตํ อลงฺกริตฺวา ตาปสสฺส สนฺติกํ เนตฺวา เทว อยํ เต ปาทปริจาริกา โหตุ อมฺหากํ ปจฺจามิตฺตํ วเธหีติ อาหํสุ ฯ ตาปโส ตํ ทิสฺวา ปฏิพทฺธจิตฺโต หุตฺวา ตาย สทฺธึ สํวาสํ กปฺเปตฺวา คุหาทฺวาเร ฐตฺวา โคจราย นิกฺขมนฺตํ มกฺกฏกํ มุคฺคเรน โปเถตฺวา ชีวิตกฺขยํ ปาเปสิ ฯ โส ตาย สทฺธึ สมคฺคสํวาสํ วสนฺโต ปุตฺตธีตาหิ วฑฺฒิตฺวา ตตฺเถว กาลมกาสิ เอวํ สา ตํ กาเมสิ ฯ สุวโปตโก อิมํ อุทาหรณํ อาหริตฺวา วจฺฉตาปโส ตาว มนุสฺโส หุตฺวา ติรจฺฉานคตาย ตาย กินฺนริยา สทฺธึ สํวาสํ กปฺเปสิ กิมงฺคํ ปน มยํ หิ อุโภปิ ปกฺขิโนว ติรจฺฉานคตา วาติ ทีปนฺโต มนุสฺสา มิคิยา วสนฺตีติ อาทิมาห ฯ เอวํ มนุสฺสา ติรจฺฉานคตาย สทฺธึ สํวาสํ วสนฺตา สนฺติ สํวิชฺชนฺติ ฯ นตฺถิ กาเม อสาทิโสติ จิตฺตเมเวตฺถ ปมาณนฺติ ฯ

สา ตสฺส วจนํ สุตฺวา สามิ จิตฺตํ นาม สพฺพกาลํ เอกสทิสํ น โหติ ปิยวิปฺปโยคสฺส ภายามิ สมฺมาติ อาห ฯ โสปิ สุวปณฺฑิโต อิตฺถีมายากุสโล เตน นํ วีมํเสนฺโต ปุน คาถมาห