หตฺถี อสฺสา รถา ปตฺติ เสนา ติฏฺฐนฺติ จมฺมิกา

อุกฺกา ปทิตฺตา ฌายนฺติ กินฺนุ มญฺญนฺติ ปณฺฑิตาติ ฯ

ตตฺถ กินฺนุ มญฺญนฺตีติ จูฬนีราชา อมฺหากํ ตุฏฺโฐ อุทาหุ กุทฺโธ กินฺนุ โข ปณฺฑิตา มญฺญนฺตีติ ปุจฺฉิ ฯ

ตํ สุตฺวา เสนโก อาห มา จินฺตยิตฺถ มหาราช อติพหู อุกฺกา ปญฺญายนฺติ ราชา ตุมฺหากํ ธีตรํ ทาตุํ คเหตฺวา เอติ มญฺเญติ ฯ ปุกฺกุโสปิ ตุมฺหากํ อาคนฺตุกสกฺการํ กาตุํ อารกฺขํ คเหตฺวา ฐิโตว ภวิสฺสตีติ ฯ เอวํ เต จตฺตาโร ปณฺฑิตา ยํ ยํ อตฺตโน รุจฺจติ ตํ ตํ กถยึสุ ฯ วิเทหราชาปิ อสุกฏฺฐาเน เสนา ติฏฺฐนฺตุ อสุกฏฺฐาเน อารกฺขํ คณฺหถ อปฺปมตฺตา โหถาติ วทนฺตานํ สทฺทํ สุณนฺโต สนฺนทฺธญฺจ เสนํ ปสฺสนฺโต มรณภยตชฺชิโต หุตฺวา มหาสตฺตสฺส กถํ ปจฺจาสึสนฺโต อิตรํ คาถมาห