ตสฺส ตํ วจนํ สุตฺวา ปณฺฑิตสฺสานุสาริโน

อุมฺมงฺคทฺวารํ วิวรึสุ ยนฺตยุตฺเต จ อคฺคเฬติ ฯ

ตตฺถ อนุสาริโนติ เวยฺยาวจฺจกรา ฯ ยนฺตยุตฺเต จ อคฺคเฬติ สูจิฆฏิกสมฺปนฺนานิ จ ทฺวารกวาฏานิ ฯ

เต อุมฺมงฺคทฺวารํ วิวริตฺวา มหาสตฺตสฺส อาโรเจสุํ ฯ โส รญฺโญ สญฺญมกาสิ กาโล เทว ปาสาทา โอตรถาติ ฯ ราชา โอตรติ ฯ เสนโก สีสโต นาฬิวตฺตํ อปเนตฺวา สาฏกํ โอมุญฺจิตฺวา กจฺฉํ ทฬฺหํ พนฺธิ ฯ อถ นํ มหาสตฺโต ทิสฺวา เสนก กึ กโรสีติ ปุจฺฉิ ฯ ปณฺฑิต อุมฺมงฺเคน คจฺฉนฺเตหิ นาม เวฐนํ โมเจตฺวา กจฺฉํ ทฬฺหํ พนฺธิตฺวา คนฺตพฺพนฺติ ฯ เสนก อุมฺมงฺคํ ปวิสนฺโต โอนมิตฺวา ชณฺณุเกหิ ปติฏฺฐาย ปวิสิสฺสามีติ มา สญฺญมกาสิ สเจ หตฺถินา คนฺตุกาโมสิ หตฺถึ อภิรูห สเจ อสฺเสน คนฺตุกาโมสิ อสฺสํ อภิรูห อุจฺโจ อุมฺมงฺโค อฏฺฐารสหตฺถุพฺเพโธ วิสาลทฺวาโร ตฺวํ ยถารุจิยา อลงฺกตปฏิยตฺโต รญฺโญ ปุรโต คจฺฉาติ อาห ฯ โพธิสตฺโต ปน เสนกสฺส คมนํ ปุรโต วิจาเรตฺวา ราชานํ มชฺเฌ กตฺวา สยํ ปจฺฉโต อโหสิ ฯ กึ การณา ฯ ราชา อลงฺกตอุมฺมงฺคํ โอโลเกนฺโต มา สณิกํ อคมาสีติ ฯ อุมฺมงฺเค มหาชนสฺส ยาคุภตฺตขาทนียาทีนิ อปฺปมาณานิ อเหสุํ ฯ เต มนุสฺสา ขาทนฺตา ปิวนฺตา อุมฺมงฺคํ โอโลเกนฺตา คจฺฉนฺติ ฯ มหาสตฺโตปิ ยาถ ยาถ มหาราชาติ โจเทนฺโต ปจฺฉโต ยาติ ฯ ราชา อลงฺกตเทวสภํ วิย อุมฺมงฺคํ โอโลเกนฺโต ยาติ ฯ