ตมตฺถํ ปกาเสนฺโต สตฺถา อาห

ปุรโต เสนโก ยาติ ปจฺฉโต จ มโหสโถ

มชฺเฌ จ ราชา เวเทโห อมจฺจปริวาริโตติ ฯ

รญฺโญ อาคตภาวํ ญตฺวา เต มาณวา รญฺโญ มาตรญฺจ เทวิญฺจ ปุตฺตญฺจ ธีตรญฺจ อุมฺมงฺคา นีหริตฺวา มหาวิสาลมาฬเก ฐเปสุํ ฯ ราชาปิ โพธิสตฺเตน สทฺธึ อุมฺมงฺคา นิกฺขมิ ฯ เต จตฺตาโร ขตฺติยา ราชานญฺจ ปณฺฑิตญฺจ ทิสฺวา นิสฺสํสยํ ปรหตฺถคตมฺหา มยํ อมฺเห คเหตฺวา อาคเตหิ ปณฺฑิตสฺส ปุริเสหิ ภวิตพฺพนฺติ มรณภยตชฺชิตา ภีตตสิตา มหาวิรวํ วิรวึสุ ฯ จูฬนีราชา กิร วิเทหรญฺโญ ปลายนภเยน คนฺตฺวา คงฺคาตีเร คาวุตมตฺเต ฐาเน อฏฺฐาสิ ฯ โส จ สนฺนิสินฺนาย รตฺติยา เตสํ วิรวํ สุตฺวา นนฺทาเทวิยา สทฺโท วิยาติ วตฺตุกาโม อโหสิ ฯ กุหึ นนฺทาเทวึ ปสฺสสีติ ปริหาสภเยน น กิญฺจิ อาห ฯ มหาสตฺโต ตสฺมึ ฐาเน ปญฺจาลจนฺทึ กุมาริกํ รตนราสิมฺหิ ฐเปตฺวา อภิสิญฺจิตฺวา มหาราช ตฺวํ อิมิสฺสา การณา อาคโตสิ อยํ อคฺคมเหสี โหตูติ อาห ฯ ตีณิ นาวาสตานิ อุปฏฺฐเปสุํ ฯ ราชา วิสาลมาฬกา โอตริตฺวา อลงฺกตนาวํ อภิรุหิ ฯ เตปิ จตฺตาโร ขตฺติยา นาวํ อภิรุหึสุ ฯ