อถ วิเทหราชา นทิโต อุตฺตริตฺวา โยชนนฺตเร มหาสตฺเตน การิตคามํ สมฺปตฺโต ฯ ตตฺถสฺส โพธิสตฺเตน ฐปิตมนุสฺสา หตฺถิพาหนาทีนิ เจว อนฺนปานาทีนิ จ อทํสุ ฯ ราชา กิลนฺตกิลนฺเต หตฺถิอสฺสรเถ นิวตฺเตตฺวา อิตเร อาทาย เตหิ สทฺธึ อญฺญํ คามํ ปาปุณิ ฯ เอเตนุปาเยน โยชนสตมคฺคํ อติกฺกมิตฺวา ปุนทิวเส ปาโตว มิถิลํ ปาวิสิ ฯ โพธิสตฺโตปิ อุมฺมงฺคทฺวารํ คนฺตฺวา อตฺตนา สนฺนทฺธขคฺคํ โอมุญฺจิตฺวา อุมฺมงฺคทฺวาเร วาลุกํ วิยูหิตฺวา ตํ ตตฺถ ฐเปสิ ฯ ฐเปตฺวา จ ปน อุมฺมงฺคํ ปวิสิตฺวา อุมฺมงฺคา นิกฺขมิตฺวา ตํ นครํ ปวิสิตฺวา ปาสาทํ อภิรุยฺห คนฺโธทเก นหาตฺวา นานคฺครสโภชนํ ภุญฺชิตฺวา สยนวรคโต มโนรโถ เม มตฺถกํ ปตฺโตติ อาวชฺเชนฺโต นิปชฺชิ ฯ อถสฺสา รตฺติยา อจฺจเยน จูฬนีราชา เสนางฺคํ วิจาริยมาโน ตํ นครํ อุปาคมิ ฯ

ตมตฺถํ ปกาเสนฺโต สตฺถา อาห

รกฺขิตฺวา กสิณํ รตฺตึ จุลเนยฺโย มหพฺพโล

อุเทนฺตํ อรุณุคฺคมฺหิ อุปการมุปาคมิ