เอวํ เวเทหํ ตชฺเชนฺโต อิทานิ นํ ชีวคฺคาหํ คณฺหิสฺสามีติ วชิรงฺกุเสน นาคํ โจเทนฺโต คณฺหถ ภินฺทถ วิชฺฌถาติ เสนํ อาณาเปนฺโต จูฬนีราชา อุปการนครํ อวตฺถรนฺโต วิย อุปาคมิ ฯ อถ นํ มหาสตฺตสฺส อุปนิขิตฺตปุริสา โก ชานาติ กึ ภวิสฺสตีติ อตฺตโน อุปฏฺฐาเก คเหตฺวา ปริวารยึสุ ฯ ตสฺมึ ขเณ โพธิสตฺโต สิริสยนา วุฏฺฐาย กตสรีรปฏิชคฺคโน ภุตฺตปาตราโส อลงฺกตปฏิยตฺโต สตสหสฺสคฺฆนิกํ กาสิกวตฺถํ นิวาเสตฺวา รตฺตกมฺพลํ เอกํเส กตฺวา สตฺตรตนขจิตํ เอกํ วลญฺชนกาญฺจนทณฺฑกํ อาทาย สุวณฺณปาทุกํ อารุยฺห เทวจฺฉราหิ วิย อลงฺกตอิตฺถีหิ พาลวีชนิยา วีชยมาโน อลงฺกตปาสาเท สีหปญฺชรํ วิวริตฺวา จูฬนีรญฺโญ อตฺตานํ ทสฺเสนฺโต สกฺกเทวราชลีลาย อปราปรํ จงฺกมิ ฯ จูฬนีราชาปิ ตสฺส อุตฺตมรูปสิรึ โอโลเกตฺวา จิตฺตํ ปสาเทตุํ นาสกฺขิ อิทานิ ตํ คณฺหิสฺสามีติ ตุริตตุริโต หตฺถิเมว เปเสสิ ฯ ปณฺฑิโต จินฺเตสิ อยํ ราชา เวเทโห เม อิเธว ลทฺโธติ สญฺญาย ตุริตตุริโต อาคจฺฉนฺโตว น ชานาติ อตฺตโน ปุตฺตทาเร คเหตฺวา อมฺหากํ รญฺโญ ปหิตภาวํ มญฺเญติ สุวณฺณาทาสสทิสํ มม มุขํ ทสฺเสตฺวา เตน สทฺธึ กเถสฺสามีติ ฯ โส วาตปาเน ฐิโตว มธุรสฺสรํ นิจฺฉาเรตฺวา เตน สทฺธึ เกฬึ กเถนฺโต อาห

กินฺนุ สนฺตรมาโนว นาคํ เปเสสิ กุญฺชรํ

ปหฏฺฐรูโป อาคมสิ ลทฺธตฺโถสฺมีติ มญฺญสิ

โอหเรตํ ธนุจาปํ ขุรปฺปํ ปฏิสํหร