ราชา ตสฺส ตํ อจฺฉมฺภีตวจนํ สุตฺวา จินฺเตสิ อยํ คหปติปุตฺโต อติสูโร หุตฺวา กเถสิ นิสฺสํสยํ เวเทโห ปลาปิโต ภวิสฺสตีติ อติวิย กุชฺฌิตฺวา ปุพฺเพ มยํ คหปติปุตฺตํ นิสฺสาย อุทรสาฏกสฺสาปิ อสฺสามิกา ชาตา อิทานิ เตน อมฺหากํ หตฺถคโต ปจฺจามิตฺโต ปลาปิโต พหุ วต โน อนตฺถการโก อุภินฺนํ กตฺตพฺพํ การณํ อิมสฺเสว กริสฺสามีติ ตสฺส การณํ กาตุํ อาณาเปนฺโต อาห

อิมสฺส หตฺถปาเท จ กณฺณนาสญฺจ ฉินฺทถ

โย เม อมิตฺตํ หตฺถคตํ เวเทหํ ปริโมจยิ

อิมํ มํสํว อาตปฺปํ สูเล กตฺวา ปจนฺตุ นํ