โอโรธา จ กุมารา จ ตว มาตา จ ขตฺติย

อุมฺมงฺคา นีหริตฺวาน เวเทหสฺสุปนามิตาติ ฯ

ตตฺถ อุมฺมงฺคาติ มยา อตฺตโน มาณเว เปเสตฺวา ปาสาทา โอตาราเปตฺวา อุมฺมงฺเคเนว อาหราเปตฺวา มหาอุมฺมงฺคา นีหราเปตฺวา พนฺธวา เต เวเทหสฺส อุปนามิตาติ ฯ

ตํ สุตฺวา ราชา จินฺเตสิ อยํ ปณฺฑิโต อติวิย ทฬฺหํ กตฺวา กเถสิ มยา จ รตฺติภาเค คงฺคาย ปสฺเสน นนฺทาเทวิยา วิย สทฺโท วิสฺสุโต อยํ ปณฺฑิโต มหาปญฺโญ กทาจิ สจฺจํ ภเณยฺยาติ อุปฺปนฺนพลวโสโก สตึ ปจฺจุปฏฺฐเปตฺวา อโสจนฺโต วิย เอกํ อมจฺจํ ปกฺโกสาเปตฺวา ชานนตฺถาย เปเสนฺโต อิมํ คาถมาห