สุญฺญํ อนฺเตปุรํ สพฺพํ กากปตนกํ ยถาติ ฯ

ตตฺถ กากปตนกํ ยถาติ มจฺฉคนฺเธหิ อาคเตหิ กากคเณหิ สมากิณฺโณ สมุทฺทตีเร ฉฑฺฑิตคามโก วิย ฯ

ตํ สุตฺวา ราชา จตุนฺนํ ชนานํปิ วิปฺปโยคสมฺภเวน โสเกน กมฺปมาโน อิทํ ทุกฺขํ มม คหปติปุตฺตํ นิสฺสาย อุปฺปนฺนนฺติ ทณฺเฑน ปหโต อาสีวิโส วิย โพธิสตฺตสฺส อติวิย กุชฺฌิ ฯ มหาสตฺโต ตสฺส โกธนาการํ ทิสฺวา อยํ ราชา มหายโส กทาจิ โกธวเสน กึ เม เอเตหีติ ขตฺติยมาเนน มํ วิเหเฐยฺย ยนฺนูนาหํ นนฺทาเทวึ อิมินา น ทิฏฺฐปุพฺพํ วิย กโรนฺโต ตสฺส สรีรวณฺณํ วณฺเณยฺยํ อถ โส ตํ อนุสฺสริตฺวา สจาหํ มโหสถํ มาเรสฺสามิ เอวรูปํ อิตฺถีรตนํ น ลภิสฺสามิ ตํ อมาเรนฺโต ปุน ตํ ลภิสฺสามีติ อตฺตโน ภริยาย สิเนเหน น กิญฺจิ มยฺหํ กริสฺสตีติ จินฺเตตฺวา อตฺตโน รกฺขนตฺถํ ปาสาเท ฐิโตว รตฺตกมฺพลนฺตเร สุวณฺณวณฺณํ พาหุํ นีหริตฺวา ตสฺสา คตมคฺคาจิกฺขนวเสเนว ตํ วณฺเณนฺโต อาห

อิโต คตา มหาราช นารี สพฺพงฺคโสภนา