เยสํ กเตน มคฺเคน เวเทโห มิถิลํ คโตติ ฯ

ตตฺถ ทิพฺพมายีธาติ ทิพฺพมายํ อิธ ฯ มาณวปุตฺตาติ อุปฏฺฐากตรุณโยธา ฯ เยสํ กเตนาติ เยหิ กเตน ฯ มคฺเคนาติ อลงฺกตอุมฺมงฺเคน ฯ

อิทํ ปน สุตฺวา ราชา อลงฺกตอุมฺมงฺเคน กิร เวเทโห คโตติ วทติ กีทิโส นุ โข อุมฺมงฺโคติ อุมฺมงฺคํ ทฏฺฐุกาโม อโหสิ ฯ อถสฺส อิจฺฉิตํ ญตฺวา มหาสตฺโต ราชา อุมฺมงฺคํ ทฏฺฐุกาโม ทสฺเสสฺสามิสฺส อุมงฺคนฺติ ทสฺเสนฺโต อิมํ คาถมาห

อิงฺฆ ปสฺส มหาราช อุมฺมงฺคํ สาธุ มาปิตํ