หตฺถีนํ อถ อสฺสานํ รถานํ อถ ปตฺตินํ

อาโลกภูตํ ติฏฺฐนฺตํ อุมฺมงฺคํ สาธุ นิฏฺฐิตนฺติ ฯ

ตตฺถ หตฺถีนนฺติ โปตฺถกมฺมจิตฺตกมฺมวเสน กตานํ เอเตสํ หตฺถิอาทีนํ ปนฺตีหิ อุปโสภิตํ อลงฺกตเทวสภาสทิสํ เอโกภาสํ หุตฺวา ติฏฺฐนฺตํ อุมฺมงฺคํ ปสฺส เทวาติ ฯ

เอวญฺจ ปน วตฺวา มหาราช มม ปญฺญาย มาปิโต จนฺทสฺส สุริยสฺส จ อุฏฺฐิตฏฺฐาเน วิย ปากโฏ อลงฺกตอุมฺมงฺโค อสีติมหาทฺวารานิ จ จตุสฏฺฐี จุลฺลทฺวารานิ จ เอกสเต สยนคพฺเพ จ อเนกสเต ทีปคพฺเภ จ ปสฺส มยา สทฺธึ สมคฺโค สมฺโมทมาโน หุตฺวา อตฺตโน ปริวาเรน สทฺธึ อุปการนครํ ปวิส เทวาติ นครทฺวารํ วิวราเปสิ ฯ ราชา เอกสตราชปริวุโต นครํ ปาวิสิ ฯ มหาสตฺโต ปาสาทา โอรุยฺห ราชานํ วนฺทิตฺวา ตํ สปริวารํ อาทาย อุมฺมงฺคํ ปาวิสิ ฯ ราชา อลงฺกตอุมฺมงฺคํ เทวสภํ วิย ทิสฺวา โพธิสตฺตสฺส คุณํ วณฺเณนฺโต อาห