ตตฺถ มิถิลํ คตนฺติ โสตฺถินา ตํ มิถิลนครํ สมฺปตฺตํ ปสฺสตุ ฯ

อิติ โส ปณฺฑิตสฺส มหนฺตํ สกฺการํ กตฺวา อุยฺโยเชสิ ฯ เตปิ เอกสตราชาโน มหาสกฺการํ กตฺวา พหุํ ปณฺณาการํ อทํสุ ฯ เตสํ สนฺติเก อุปนิกฺขิตฺตกปุริสาปิ ปณฺฑิตเมว ปริวารยึสุ ฯ โส มหนฺเตน ปริวาเรน มคฺคํ ปฏิปชฺชิตฺวา อนฺตรามคฺเคเยว จูฬนีรญฺญา ทินฺนคาเมหิ อายํ หราเปตุํ ปุริสํ เปเสตฺวา เวเทหรฏฺฐํ สมฺปาปุณิ ฯ เสนโกปิ กิร อนฺตรามคฺเค ปุริสํ ฐเปตฺวา จูฬนีรญฺโญ อาคมนํ วา อนาคมนํ วา ชานิตฺวา ยสฺสกสฺสจิ อาคมนญฺจ มยฺหํ อาโรเจหีติ อาณาเปสิ ฯ โสปิ ติโยชนมตฺถเกเยว มหาสตฺตํ ทิสฺวา อาคนฺตฺวา ปณฺฑิโต กิร มหนฺเตน ปริวาเรน อาคจฺฉตีติ เสนกสฺส อาโรเจสิ ฯ โส ตํ สุตฺวา ราชกุลํ อคมาสิ ฯ ราชาปิ ปาสาทตเล ฐิโตว วาตปาเนน พหิ โอโลเกนฺโต มหตึ เสนํ ทิสฺวา มโหสถปณฺฑิตสฺส เสนา มนฺทา อยํ ปน อติวิย มหตี ทิสฺสติ กจฺจิ นุ โข จูฬนีราชา อาคโต สิยาติ ภีตตสิโต ตมตฺถํ ปุจฺฉนฺโต อาห

หตฺถี อสฺสา รถา ปตฺตี เสนา สา ทิสฺสเต มหา

จตุรงฺคินี ภึสรูปา กินฺนุมญฺญนฺติ ปณฺฑิตาติ ฯ