อุปฺปาเท สุปิเน ยุตฺโต นิยฺยาเน จ ปเวสเน

ปโฐ ภุมฺมนฺตลิกฺขสฺมึ นกฺขตฺตปทโกวิโท

พฺราหฺมณํ เกน โทเสน ทชฺชาสิ ทกรกฺขิโนติ ฯ

ตตฺถ สพฺพนิมิตฺตานนฺติ อิมินา นิมิเตน อิทํ ภวิสฺสติ อิมินา อิทนฺติ เอวํ สพฺพนิมิตฺเตสุ กุสโล ฯ รุทญฺญูติ สพฺพรวํ ชานาติ ฯ อุปฺปาเทติ จนฺทคฺคาหสุริยคฺคาหอุกฺกาปาตทิสาทาหาทิเก อุปฺปาเท ฯ สุปิเน ยุตฺโตติ สุปิเน จ ตสฺส นิปฺผตฺติ ชานนวเสน ยุตฺโต ฯ นิยฺยาเน จ ปเวสเนติ อิมินา นกฺขตฺเตน นิยฺยานิตพฺพํ อิมินา ปวิสิตพฺพนฺติ ชานาติ ฯ ปโฐ ภุมฺมนฺตลิกฺขสฺมินฺติ เฉโก ปฏิพโล ภูมิยญฺจ อนฺตลิกฺเข จ โทสคุเณ ชานิตุํ สมตฺโถ ฯ นกฺขตฺตปทโกวิโทติ อฏฺฐวีสติยา นกฺขตฺตโกฏฺฐาเสสุ เฉโก ฯ ตํ เกน โทเสน ทกรกฺขสสฺส ทสฺสสีติ ฯ