อตีเต ภิกฺขเว พาราณสิยํ พฺรหฺมทตฺโต นาม ราชา รชฺชํ กาเรนฺโต ปุตฺตสฺส อุปรชฺชํ ทตฺวา ตสฺส มหนฺตํ ยสํ ทิสฺวา รชฺชมฺปิ เม คณฺเหยฺยาติ อุปฺปนฺนาสงฺโก ตํ ปกฺโกสาเปตฺวา น สกฺกา ตาต อิธ วสิตุํ ตวํ อิโต นิกฺขมิตฺวา ยตฺถ เต รุจฺจติ ตตฺถ วสิตฺวา มมจฺจเยน กุลสนฺตกํ รชฺชํ คณฺหาหีติ อาห ฯ โส สาธูติ สมฺปฏิจฺฉิตฺวา ปิตรํ วนฺทิตฺวา นครา นิกฺขมิตฺวา อนุปุพฺเพนเยว ยมุนํ คนฺตฺวา ยมุนาย จ สมุทฺทสฺส จ ปพฺพตสฺส จ อนฺตเร ปณฺณสาลํ มาเปตฺวา วนมูลผลาหาโร ตตฺถ ปฏิวสติ ฯ ตทา สมุทฺทฏฺฐิกา นาคภวเน เอกา มตปติกา นาคมาณวิกา อญฺญาสํ สปติกานํ ยสํ โอโลเกตฺวา กิเลสํ นิสฺสาย อุกฺกณฺฐิตา นาคภวนา นิกฺขมิตฺวา สมุทฺทตีเร วิจรนฺตี ราชปุตฺตสฺส ปทวลญฺชํ ทิสฺวา ปทานุสาเรน คนฺตฺวา ตํ ปณฺณสาลํ อทฺทส ฯ ตทา ราชปุตฺโต ผลตฺถาย อรญฺญํ คโต โหติ ฯ สา ปณฺณสาลํ ปวิสิตฺวา กฏฺฐตฺถรกญฺจ เสสปริขาเร จ ทิสฺวา จินฺเตสิ อิทํ เอกสฺส ปพฺพชิตสฺส วสนฏฺฐานํ ภวิสฺสติ วีมํสิสฺสามิ นํ สทฺธาปพฺพชิโต นุ โข โน วา สเจ หิ สทฺธาปพฺพชิโต ภวิสฺสติ เนกฺขมฺมาธมุตฺโต น เม อลงฺกตสยนํ สาทิยิสฺสติ สเจ กามาภิรโต ภวิสฺสติ น สทฺธาปพฺพชิโต มม สชฺชิตสยนสฺมิเยว นิปชฺชิสฺสติ อถ นํ คเหตฺวา อตฺตโน สามิกํ กตฺวา อิเธว วสิสฺสามีติ ฯ สา นาคภวนํ คนฺตฺวา ทิพฺพปุพฺผานิ เจว ทิพฺพคนฺเธ จ อาหริตฺวา ปุปฺผสยนํ สชฺเชตฺวา ปณฺณสาลายํ ปุปฺผุปหารํ กตฺวา คนฺธจุณฺณานิ วิกีริตฺวา ปณฺณสาลํ อลงฺกริตฺวา นาคภวนเมว คตา ฯ ราชปุตฺโต สายณฺหสมยํ อาคนฺตฺวา ปณฺณสาลํ ปวิฏฺโฐ ตํ ปวุตฺตึ ทิสฺวา เกน นุโข อิมํ สยนํ สชฺชิตนฺติ ผลาผลํ ปริภุญฺชิตฺวา อโห สุคนฺธานิ ปุปฺผานิ อโห สุคนฺธานิ ปุปฺผานิ มนาปํ วต เม กตฺวา สยนํ ปญฺญตฺตนฺติ น สทฺธาปพฺพชิตภาเวน โสมนสฺสชาโต ปุปฺผสยเน ปริวเตตฺวา นิปนฺโน นิทฺทํ โอกมิตฺวา ปุน ทิวเส สุริยุคฺคมเน อุฏฺฐาย ปณฺณสาลํ อสมฺมชฺชิตฺวา วนมูลผลาผลตฺถาย อคมาสิ ฯ ตสฺมึ ขเณ นาคมาณวิกา อาคนฺตฺวา มิลาตานิ ปุปฺผานิ ทิสฺวา กามาธิมุตฺโต เอส น สทฺธาย ปพฺพชิโต สกฺกา นํ คณฺหิตุนฺติ ญตฺวา โปราณปุปฺผานิ นีหริตฺวา อญฺญานิ ปุปฺผานิ อาหริตฺวา ตเถว ปุปฺผสยนํ สชฺเชตฺวา ปณฺณสาลํ อลงฺกริตฺวา จงฺกเม จ ปุปฺผานิ วิกีริตฺวา นาคภวนเมว คตา ฯ โส ตํ ทิวสมฺปิ ปุปฺผสยเน สยิตฺวา ปุน ทิวเส จินฺเตสิ โก นุโข อิมํ ปณฺณสาลํ อลงฺกโรตีติ ฯ โส ผลาผลตฺถาย อคนฺตฺวา ปณฺณสาลาโต อวิทูเร ปฏิจฺฉนฺเน ฐาเน อฏฺฐาสิ ฯ อิตราปิ พหู คนฺเธ เจว ปุปฺผานิ จ อาทาย อสฺสมปทํ อาคจฺฉติ ฯ ราชปุตฺโต อุตฺตมรูปธรํ นาคมาณวิกํ ทิสฺวาว ปฏิพทฺธจิตฺโต อตฺตานํ อทสฺเสตฺวา ตสฺสา ปณฺณสาลํ ปวิสิตฺวา ปุปฺผสยนํ สชฺชนกาเล ปวิสิตฺวา กาสิ ตวนฺติ ปุจฺฉิ ฯ สา นาคมาณวิกา นาม สามีติ ฯ สสฺสามิกา อสฺสามิกาสีติ ปุจฺฉิ ฯ สามิ อหํ ปุพฺเพ สสฺสามิกา อิทานิ อสฺสามิกา วิธวา ชาตา ตวมฺปน กตฺถ วาสิโกสีติ ฯ อหํ พาราณสิรญฺโญ ปุตฺโต พฺรหฺมทตฺตกุมาโร นาม ตวมฺปน นาคภวนํ ปหาย กสฺมา อิธ วิจรสีติ ฯ สามิ อหํ ตตฺถ สสฺสามิกานํ นาคมานวิกานํ ยสํ โอโลเกตฺวา กิเลสํ นิสฺสาย อุกฺกณฺฐิตา ตโต นิกฺขมิตฺวา สามิกํ ปริเยสนฺตี วิจรามีติ ฯ เตน หิ ภทฺเท อหมฺปิ น สทฺธาปพฺพชิโต ปิตรา นีหริตตฺตา อิธาคนฺตฺวา วิหรามิ ตวํ มา จินฺตยิ อหนฺเต สามิโก ภวิสฺสามิ อุโภปิ อิธ สมคฺคสํวาสํ วสิสฺสามาติ ฯ สา สาธูติ สมฺปฏิจฺฉิ ฯ ตโต ปฏฺฐาย เต อุโภปิ ตตฺเถว สมคฺคสํวาสํ วสึสุ ฯ สา อตฺตโน อานุภาเวน มหารหํ เคหํ มาเปตฺวา มหารหํ ปลฺลงฺกํ อาหริตฺวา สยนํ ปญฺญาเปสิ ฯ โส ตโต ปฏฺฐาย มูลผลาผลํ อขาทิตฺวา ทิพฺพนฺนปานเมว ภุญฺชิตฺวา ชีวิตํ กปฺเปสิ ฯ อปรภาเค นาคมาณวิกา คพฺภํ ปฏิลภิตฺวา ปุตฺตํ วิชายิ ฯ ตสฺส สาครตีเร ชาตตฺตา สาครพฺรหฺมทตฺโตติ นามํ กรึสุ ฯ ตสฺส ปทสา คมนกาเล นาคมาณวิกา ธีตรํ วิชายิ ฯ ตสฺสา สมุทฺทตีเร ชาตตฺตา สมุทฺทชาติ นามํ กรึสุ ฯ คเต จ ปน กาลนฺตเร อเถโก พาราณสิวาสี วนจรโก ตํ ฐานํ ปตฺโต กตปฏิสนฺถาโร ราชปุตฺตํ สญฺชานิตฺวา กติปาหํ ตตฺถ วสิตฺวา เทว อหํ ตุมฺหากํ อิธ วสนภาวํ ราชกุลสฺส อาโรเจสฺสามีติ วตฺวา ตํ วนฺทิตฺวา ตโต นิกฺขมิตวา นครํ อคมาสิ ฯ ตทา ราชา กาลมกาสิ ฯ อมจฺจา ตสฺส สรีรกิจฺจํ กตฺวา สตฺตเม ทิวเส สนฺนิปติตฺวา อราชิกํ รชฺชํ นาม น สณฺฐาติ ราชปุตฺตสฺส วสนฏฺฐานํ วา อตฺถิภาวํ วา นตฺถิภาวํ วา น ชานาม ผุสฺสรถํ วิสชฺเชตฺวา ราชานํ คหิสฺสามาติ มนฺตยึสุ ฯ ตสฺมึ ขเณ วนจรโก นครํ ปวิสิตฺวา เตสํ ตํ กถํ สุตฺวา อมจฺจานํ สนฺติกํ คนฺตฺวา อหํ ราปุตฺตสฺส สนฺติเก ตโย จตฺตาโร ทิวเส วสิตฺวา อาคโตมฺหีติ ตํ ปวุตฺตึ อาจิกฺขิ ฯ อถ ตํ สุตฺวา อมจฺจา ตสฺส สกฺการํ กตฺวา เตน มคฺคนายเกน ตตฺถ คนฺตฺวา กตปฏิสนฺถารา รญฺโญ กาลกตภาวํ อาโรเจตฺวา เทว รชฺชํ ปฏิปชฺชาหีติ อาหํสุ ฯ โส นาคมาณวิกาย จิตฺตํ ชานิสฺสามีติ ตํ อุปสงฺกมิตฺวา ภทฺเท ปิตา เม กาลกโต อมจฺจา มยฺหํ ฉตฺตํ อุสฺสาเปตุํ อิธ อาคตา คจฺฉาม ภทฺเท อุโภปิ ทฺวาทสโยชนิกาย พาราณสิยํ รชฺชํ กาเรสฺสาม ตฺวํ โสฬสนฺนํ อิตฺถีสหสฺสานํ เชฏฺฐกา ภวิสฺสสีติ อาห ฯ สามิ น สกฺกา มยา ตยา สทฺธึ คนฺตุนฺติ ฯ กึ การณาติ ฯ มยํ โฆรวิสา ขิปฺปโกธา อปฺปมตฺตเกนปิ กุชฺฌาม สปติวาโส จ นาม ภาริโย สจาหํ กิญฺจิ ทิสฺวา วา สุตฺวา วา กุทฺธา กิญฺจิ โอโลเกสฺสามิ ภสฺมมุฏฺฐิ วิย วิปฺปกีริสฺสติ อิมินา การเณน น สกฺกา มยา ตยา สทฺธึ คนฺตุนฺติ ฯ ราชปุตฺโต ปุน ทิวเสปิ ตํ ยาจเตว ฯ อถ นํ สา เอวมาห อหํ ตาว เกนจิ ปริยาเยน น คมิสฺสามิ อิเม ปน เม ปุตฺตา นาคกุมารา ตว สมฺภเวน ชาตตฺตา มนุสฺสชาติกา สเจ เต มยิ สิเนโห อตฺถิ อิเมสุ อปฺปมตฺโต ภว อิเม โข ปน อุทกวีชกา สุขุมาลา มคฺคํ คจฺฉนฺตา วาตาตเปน กิลมิตฺวา มเรยฺยุํ เอกนฺนาวํ ขนาเปตฺวา อุทกสฺส ปูเรตฺวา ตาย เต อุทกกีฬํ กีฬาเปตฺวา เนตฺวา นคเรปิ เตสํ อนฺโต วตฺถุสมึเยว โปกฺขรณึ กาเรยฺยาสิ เอวํ เต น กิลมิสฺสนฺตีติ ฯ สา เอวญฺจ ปน วตฺวา ราชปุตฺตํ วนฺทิตฺวา ปทกฺขิณํ กตฺวา ปุตฺเต อาลิงฺคิตฺวา ถนนฺตเร นิปชฺชาเปตฺวา สีเส จุมฺพิตฺวา ราชปุตฺตสฺส นิยฺยา เทตฺวา โรทิตฺวา กนฺทิตฺวา ตตฺเถว อนฺตรหิตา นาคภวนเมว อคมาสิ ฯ ราชปุตฺโตปิ โทมนสฺสปฺปตฺโต อสฺสุปุณฺเณหิ เนตฺเตหิ นิเวสนา นิกฺขมิตฺวา อกฺขีนิ ปุญฺฉิตฺวา อมจฺเจ อุปสงฺกมิ ฯ เต ตํ ตตฺเถว อภิสิญฺจิตฺวา เทว อมฺมหากํ นครํ คจฺฉามาติ วทึสุ ฯ เตน หิ สีฆํ นาวํ ขนิตฺวา สกฏํ อาโรเปตฺวา อุทกสฺส ปูเรตฺวา อุทกปิฏฺเฐ วณฺณคนฺธสมฺปนฺนานิ นานาปุปฺผานิ วิกีรถ มม ปุตฺตา อุทกวีชกา เต ตตฺถ กีฬนฺตา สุขํ คมิสฺสนฺตีติ ฯ อมจฺจา ตถา กรึสุ ฯ ราชา พาราณสึ ปตฺวา อลงฺกตนครํ ปวิสิตฺวา โสฬสสหสฺสาหิ นาฏฺกิตฺถีหิ อมจฺจาทีหิ จ ปริวุโต มหาตเล นิสีทิตฺวา สตฺตาหํ มหาปานํ ปิวิตฺวา ปุตฺตานํ อตฺถาย โปกฺขรณึ กาเรสิ ฯ เต ตตฺถ นิวทฺธํ กีฬึสุ ฯ อเถกทิวสํ โปกฺขรณิยํ อุทเก ปเวสิยมาเน เอโกกจฺฉโป ปวิสิตฺวา นิกฺขมนฏฺฐานํ อปสฺสนฺโต โปกฺขรณีตเล นิมุชฺชิตฺวา ทารกานํ กีฬนกาเล อุทกโต อุฏฺฐาย สีสํ นีหริตฺวา เต โอโลเกตฺวา ปุน อุทเก นิมุชฺชิ ฯ เต ตํ ทิสฺวา ภีตตสิตา ปิตุ สนฺติกํ คนฺตฺวา ตาต โปกฺขรณิยํ เอโก ยกฺโข อมฺเห ตาเสตีติ วทึสุ ฯ ราชา คจฺฉถ นํ คณฺหถาติ ราชปุริเส อาณาเปสิ ฯ เต ชาลํ ขิปิตฺวา กจฺฉปํ อาทาย รญฺโญ ทสฺเสสุํ ฯ กุมารา ตํ ทิสฺวา เอส ตาต ปิสาโจ เอส ตาต ปิสาโจติ วิรวึสุ ฯ ราชา ปุตฺตสิเนเหน กจฺฉปสฺส กุชฺฌิตฺวา คจฺฉถสฺส กมฺมกรณํ กโรถาติ อาณาเปสิ ฯ ตตฺเถโก อยํ ราชเวริโก เอตํ อุทุกฺขเล ปกฺขิตฺวา มุสเลหิ โกฏฺเฏตฺวา จุณฺณํ กาตุํ วฏฺฏตีติ อาห ฯ เอกจฺเจ อคฺคิมฺหิ ตีหิ ปาเกหิ ปจิตฺวา ขาทิตุํ วฏฺฏตีติ อาหํสุ ฯ เอกจฺเจ องฺคาเรสุ อุตฺตานํ กตฺวา ตาเปตุํ วฏฏตีติ อาหํสุ ฯ เอกจฺเจ อนฺโตกฏาเหเยว นํ ปจิตุํ วฏฺฏตีติ อาหํสุ ฯ เอโก ปน อุทกภีรุโก อมจฺโจ อิมํ กจฺฉปํ ยมุนาย อาวฏฺเฏ ปกฺขิตุํ วฏฺฏติ ตตฺถ มหาวินาสํ ปาปุณิสฺสติ เอวรูปา หิสฺส กมฺมกรณา นตฺถีติ อาห ฯ กจฺฉโป ตสฺส กถํ สุตฺวา สีสํ นีหริตฺวา เอวมาห อมฺโภ กินฺเต มยา อปราโธ กโต โย มํ เอวรูปํ กมฺมกรณํ วิจาเรสิ มยา หิ สกฺกา อิตเร กมฺมกรเณ สหิตุํ อยมฺปน อติกกฺขโล มา เอวรูปํ อวจาติ ฯ ตํ สุตฺวา ราชา อิมํ ทุกฺขํ เอตเทว กาเรตุํ วฏฺฏตีติ ยมุนาย อาวฏฺเฏ ขิปาเปสิ ฯ โส เอกํ นาคภวนคามึ อุทกวาหํ ปตฺวา นาคภวนํ อคมาสิ ฯ อถ นํ ตสฺมึ อุทกวาเห กีฬนฺตา ธตรฏฺฐสฺส นาครญฺโญ ปุตฺตา นาคมาณวกา ทิสฺวา คณฺหถ นํ ทาสนฺติ อาหํสุ ฯ โส จินฺเตสิ อหํ พาราณสีรญฺโญ หตฺถา มุญฺจิตฺวา อิทานิ เอวรูปานํ ผรุสานํ นาคานํ หตฺถํ ปตฺโต เกน นุโข อุปาเยน มุญฺเจยฺยนฺติ ฯ โส อตฺเถโก อุปาโย อหํ มุสาวาทํ กตฺวา มุญฺเจยฺยนฺติ จินฺเตตฺวา ตุมฺเห ธตรฏฺฐสฺส นาครญฺโญ สนฺติกา หุตฺวา กสฺมา มํ เอวํ วเทถ อหํ จิตฺตจูโฬ นาม กจฺฉโป พาราณสิรญฺโญ ทูโต ธตรฏฺฐสฺส สนฺติกํ อาคโต อมฺหากํ ราชา ธตรฏฺฐสฺส ธีตรํ ทาตุกาโม มํ ปหิณิ ตสฺส มํ ทสฺเสถาติ อาห ฯ เต สทฺทหิตฺวา โสมนสฺสชาตา ตํ อาทาย รญฺโญ สนฺติกํ คนฺตฺวา ตมตฺถํ อาโรเจสุํ ฯ ราชา อาเนถ นนฺติ ตํ ปกฺโกสาเปตฺวา ตํ ทิสฺวาว อนตฺตมโน หุตฺวา เอวรูโป ลามกสรีโร ทูตกมฺมํ กาตุํ น สกฺโกตีติ อาห ฯ ตํ สุตฺวา กจฺฉโป กิมฺปน มหาราช ทูเตหิ นาม ตาลปฺปมาเณหิ ภวิตพฺพํ สรีรํ หิ ขุทฺทกํ วา มหนฺตํ วา อปฺปมาณํ คตคตฏฺฐาเน กมฺมนิปฺผาทนเมว ปมาณํ อิติ มหาราช อมฺหากํ รญฺโญ พหู ทูตา ถเล กมฺมํ มนุสฺสา กโรนฺติ อากาเส ปกฺขิโน กโรนฺติ อุทเก อหํ จิตฺตจูโฬ นาม ฐานนฺตรปฺปตฺโต ราชวลฺลโภ คามปริโภโค มา มํ ปริภวถาติ อตฺตโน คุณํ วณฺเณสิ ฯ อถ นํ ธตรฏฺโฐ ปุจฺฉิ เกน ปนตฺเถน รญฺญา เปสิโตสีติ ฯ มหาราช อมฺหากํ ราชา มํ เอวมาห มยา สกลชมฺพูทีเปหิ ราชูหิ สทฺธึ มิตฺตธมฺโม กโต อิทานิ ธตรฏฺเฐน นาคราเชน สทฺธึ มิตฺตธมฺมํ กาตุํ วฏฺฏตีติ มม ธีตรํ สมุทฺทชํ ธตรฏฺฐสฺส ทมฺมีติ วตฺวา มํ ปหิณิ ตุมฺเห ปปญฺจํ อกตฺวา มยา สทฺธึเยว ปุริเส เปเสตฺวา ทิวสํ ววฏฺฐเปตฺวา ทาริกํ คณฺหถาติ ฯ โส ตุสิตฺวา ตสฺส สกฺการํ กาเรตฺวา เตน สทฺธึ จตฺตาโร นาคมาณวเก เปเสสิ คจฺฉถ ตุมฺเห รญฺโญ วจนํ สุตฺวา ทิวสํ ววฏฺฐเปตฺวา เอถาติ ฯ เต สาธูติ วตฺวา กจฺฉปํ คเหตฺวา นาคภวนา นิกฺขมึสุ ฯ กจฺฉโป ยมุนาย จ พาราณสิยา จ อนฺตเร เอกมฺปทุมสรํ ทิสฺวา เอเกนุปาเยน ปลายิตุกาโม เอวมาห โภ นาคมาณวกา อมฺหากํ ราชา จ ปุตฺตทารา จสฺส มํ อุทเก จรนฺตํ ราชนิเวสนํ คตํ ทิสฺวา ปทุมานิ โน เทหิ ภึสมูลานิ เทหีติ ยาจนฺติ อหํ เตสํ อตฺถาย ตานิ คณฺหิสฺสามิ ตุมฺเห เอตฺถ มํ วิสชฺเชตฺวา มํ อปสฺสนฺตาปิ ปุเรตรํ รญฺโญ สนฺติกํ คจฺฉถ อหํ โว ตตฺเถว ปสฺสิสฺสามีติ ฯ เต ตสฺส กถํ สทฺทหิตฺวา ตํ วิสชฺเชสุํ ฯ โส ตตฺถ เอกมนฺเต นิลิยิ ฯ อิตเรปิ นํ อทิสฺวา รญฺโญ สนฺติกํ คโต ภวิสฺสตีติ สญฺญาย มาณวกวณฺเณน ราชานํ อุปสงฺกมึสุ ฯ