ตตฺถ พหูนมปีติ ปญฺจโยชนสติกสฺส นาคภวนสฺส อิสฺสรภาวํ สนฺธาเยวาห ฯ น เม ธีตรมารโหติ เอวํ มหานุภาโวปิ สมาโน ปเนโส อหิชาติกตฺตา มม ธีตรํ อรโห น โหติ ฯ ขตฺติโย จ วิเทหานนฺติ อิทํ มาตุปกฺขญาตกํ ทสฺเสนฺโต อาห ฯ สมุทฺทชาติ โส ขตฺติโย จ วิเทหราชปุตฺโต มม ธีตา จ สมุทฺทชา เต อุโภปิ อภิชาตา อญฺญมญฺญํ สํวาสํ อรหนฺติ น เหสา มณฺฑูกภกฺขสฺส สปฺปสฺส อนุจฺฉวิกาติ อาห ฯ

ตํ สุตฺวา นาคมาณวกา ตํ ตตฺเถว นาสวาเตน มาเรตุกามา หุตฺวาปิ อมฺหากํปิ ทิวสํ ววฏฺฐาปนตฺถาย รญฺญา เปสิตานํ อิมํ มาเรตฺวา คนฺตุํ น ยุตฺตํ คนฺตฺวา รญฺโญ อาจิกฺขิตฺวา ชานิสฺสามาติ เต ตโต อุฏฺฐาย ราชนิเวสนา นิกฺขมิตฺวา ปฐวิยํ นิมุชฺชิตฺวา ตตฺถ คนฺตฺวา กึ ตาตา ลทฺธา โว ราชธีตาติ รญฺญา ปุจฺฉิตา รญฺโญ กุชฺฌิตฺวา กึ เทว อมฺเห อการณา ยตฺถ วา ตตฺถ วา เปเสสิ สเจ มาเรตุกาโมสิ อิเธว โน มาเรหิ โส ตุมฺเห อกฺโกสติ ปริภาสติ อตฺตโน ธีตรํ ชาติมเทน อุกฺขิปตีติ เตน วุตฺตญฺจ อวุตฺตญฺจ วตฺวา รญฺโญ โกธํ อุปาทยึสุ ฯ โส อตฺตโน ปริสํ สนฺนิปาตาเปตุํ อาณาเปนฺโต อาห

กมฺพลสฺสตรา อุฏฺเฐนฺตุ สพฺเพ นาเค นิเวทถ

พาราณสึ ปวชฺชนฺตุ มา จ กิญฺจิ วิเหฐยุนฺติ ฯ