เอส ทิพฺโย มมาวาโส อเนกสตโปริโส

มยูรโกญฺจาภิรุทํ นีโลทํ วนมชฺฌโต

ยมุนํ ปวิส มา ภีโต เขมํ วตฺตวตํ สิวนฺติ ฯ

ตตฺถ สทาวฏฺฏนฺติ สทา ปวตฺตํ อาวฏฺฏํ ฯ เภสฺมินฺติ ภยานกํ ฯ อเปกฺขสีติ ยํ เอตํ เอวรูปํ รหทํ ปสฺสสิ ฯ มยูรโกญฺจาภิรุทนฺติ ยมุนาย นทิยา อุโภสุ ตีเรสุ วนฆฏายํ วสนฺเตหิ มยูเรหิ จ โกญฺเจหิ จ อภิรุทํ อุปกูชิตํ ฯ นีโลทนฺติ นีลสลิลํ ฯ วนมชฺฌโตติ วนมชฺเฌน สนฺทมานํ ฯ ปวิส มา ภีโตติ เอวรูปํ ยมุนํ อภีโต หุตฺวา ปวิส ฯ วตฺตวตนฺติ วตฺตสมฺปนฺนานํ อาจารวนฺตานํ วสนภูมึ ปวิส ฯ