ตตฺถ สมา สมนฺตปริโตติ ปริสมนฺตโต สพฺพทิสาภาเคสุ อยํ ตว นาคภวเน มหี สุวณฺณรชตมณิมุตฺตาวาลุกปริกิณฺณา ฯ สมาติ สมตลา มหี ฯ ปหุตตครา มหีติ ปหุเตหิ ตครคจฺเฉหิ สมนฺนาคตา ฯ อินฺทโคปกสญฺฉนฺนาติ สวณฺณอินฺทโคปเกหิ สญฺฉนฺนา ฯ โสภติ หริตุตฺตมาติ หริตวณฺณทพฺพติณสญฺฉนฺนา โสภตีติ อตฺโถ ฯ วนเจตฺยานีติ วนฆฏานิ ฯ โอปุปฺผปทุมาติ มุญฺจิตฺวา ปติเตหิ ปทุเมหิ สญฺฉนฺนา อุทกปิฏฺฐา ฯ สุนิมฺมิตาติ ตว ปุญฺญสมฺปตฺติยา สุฏฺฐุ นิมฺมิตา ฯ อฏฺฐํสาติ ตว วสนปาสาเทสุ อฏฺฐํสา สุกตา เวฬุริยามยา ถมฺภา เตหิ ถมฺเภหิ สหสฺสถมฺภา ตว ปาสาทา นาคกญฺญาหิ ปูรา โชตเร โชตยนฺติ ฯ อุปปนฺโนสีติ เอวรูเป วิมาเน นิพฺพตฺโตสีติ อตฺโถ ฯ สหสฺสเนตฺตสฺส วิมานนฺติ เวชยนฺตปาสาทํ ฯ อิทฺธิ หิ ตยายํ วิปุลาติ ยสฺมา ตว วิปุลา อยํ อิทฺธิ ตสฺมา ตวํ เตน อุโปสถกมฺเมน สกฺกสฺสาปิ วิมานํ น ปตฺเถสิ อญฺญํ ตโต อุตฺตรึ มหนฺตํ ฐานํ ปตฺเถสีติ มญฺญามิ ฯ

ตํ สุตฺวา มหาสตฺโต มา เหวํ พฺราหฺมณ อวจฺจ สกฺกสฺส ยสํ ปฏิจฺจ อมฺหากํ ยโส หีโน นาม สิเนรุปพฺพตสนฺติเก สาสโป วิย ขายติ มยํ ตสฺส ปริจาริเกนาปิ น อคฺฆามาติ วตฺวา คาถมาห

มนสา นาภิปตฺตพฺโพ อานุภาโว ชุตีมโต

ปริจาริยมานานํ อินฺทานํ วสวตฺตินนฺติ ฯ