ตสฺส ตํ วจนํ สุตฺวา อุฏฺฐาย จตุโร ชนา

เปสิตา ภูริทตฺเตน ขิปฺปํ ปาเปสุํ พฺราหฺมณนฺติ ฯ

ตตฺถ ปาเปสุนฺติ ยมุนาโต อุตฺตริตฺวา พาราณสิมคฺคํ ปาปยึสุ ปาปยิตฺวา จ ปน ตุมฺเห คจฺฉถาติ วตฺวา นาคภวนเมว ปจฺจาคมึสุ ฯ

พฺราหฺมโณปิ ตาต โสมทฺตฺต อิมสฺมึ ฐาเน มิคํ วิชฺฌิมฺหา อิมสฺมึ สูกรนฺติ ปุตฺตสฺส อาจิกฺขนฺโต คนฺตฺวา อนฺตรามคฺเค โปกฺขรณึ ทิสฺวา ตาต โสมทตฺต นหายามาติ วตฺวา สาธุ ตาตาติ วุตฺเต อุโภปิ ทิพฺพาภรณานิ เจว ทิพฺพวตฺถานิ จ โอมุญฺจิตฺวา ภณฺฑิกํ กตฺวา โปกฺขรณีตีเร ฐเปตฺวา โอตริตฺวา นหายึสุ ฯ ตสฺมึ ขเณ ตานิ อนฺตรธายิตฺวา นาคภวนเมว อคมํสุ ฯ ปฐมํ นิวตฺถกาสาวปิโลติกาว เนสํ สรีเร ปฏิมุญฺจึสุ ฯ ธนุสรสตฺติโยปิ ปากติกาว อเหสุํ ฯ โสมทตฺโตปิ นาสิตมฺหิ ตยา ตาตาติ ปริเทวิ ฯ อถ นํ ปิตา มา จินฺตยิ ตาต มิเคสุ สนฺเตสุ อรญฺเญ มิเค วธิตฺวา ชีวิตํ กปฺเปสฺสามาติ อสฺสาเสสิ ฯ โสมทตฺตสฺส มาตา เตสํ อาคมนํ สุตฺวา ปจฺจุคฺคนฺตฺวา ฆรํ เนตฺวา อนฺนปาเนน สนฺตปฺเปสิ ฯ พฺราหฺมโณ ภุญฺชิตฺวาว นิทฺทํ โอกฺกมิ ฯ อิตรา ปุตฺตํ ปุจฺฉิ ตาต โสมทตฺต เอตฺตกํ กาลํ กุหึ คตตฺถาติ ฯ อมฺม ภูริทตฺเตน นาคราเชน อมฺเห นาคภวนํ นีตา ตโต อุกฺกณฺฐิตฺวา อิทานิ อาคตมฺหาติ ฯ กิญฺจิ ปน โว รตนํ อาภฏนฺติ ฯ นาภฏํ อมฺมาติ ฯ กึ ตุมฺหากํ เตน น กิญฺจิ ทินฺนนฺติ ฯ อมฺม ภูริทตฺเตน เม ปิตุโน สพฺพกามทโท มณิ ทินฺโน อโหสิ อิมินา ปน น คหิโตติ ฯ กึ การณาติ ฯ ปพฺพชิสฺสติ กิร อมฺมาติ ฯ สา เอตฺตกํ กาลํ ทารเก มม ภาเร กโรนฺโต นาคภวเน วสิตฺวา อิทานิ กิร ปพฺพชิสฺสตีติ กุชฺฌิตฺวา วีหิภญฺชนทพฺพิยา ปิฏฺฐึ โปเถนฺตี หเร ทุฏฺฐ พฺราหฺมณ ปพฺพชิสฺสามีติ กิร ภูริทตฺเตน ทินฺนํ มณิรตนํ น คณฺหสิ อถ กสฺมา อปพฺพชิตฺวา อิธาคโตสิ นิกฺขม สีฆํ มม ฆราติ สนฺตชฺเชสิ ฯ อถ นํ ภทฺเท มา มํ กุชฺฌิ อรญฺเญ มิเคสุ สนฺเตสุ ตํ วธิตฺวา อหนฺตํ โปเสสฺสามีติ วตฺวา ตโต ปุตฺเตน สทฺธึ อรญฺญํ คนฺตฺวา ปุริมนิยาเมเนว ชีวิตํ กปฺเปสิ ฯ