เนสาทพฺราหฺมโณปิ โภ อาลมฺพายน อิมํ นาคํ คณฺห เทหิ เม มณินฺติ อาห ฯ อาลมฺพายโน นาคํ ทิสฺวา ตุฏฺโฐ มณึ กิญฺจิ ๑- ติณํ วิย อคเณตฺวา คณฺห พฺราหฺมณาติ ตสฺส หตฺเถ ขิปิ ฯ โส ตสฺส หตฺถโต คลิตฺวา ปฐวิยํ ปตติ ฯ ปติตมตฺโตเยว ปฐวิยํ ปวิสิตฺวา นาคภวนเมว คโต ฯ เนสาทพฺราหฺมโณ มณิรตนโต จ ภูริทตฺเตน สทฺธึ มิตฺตภาวโต จ ปุตฺตโต จาติ ตีหิ ฐาเนหิ ปริหายิ ฯ โส นิปฺปจฺจโย ชาโตมฺหิ ปุตฺตสฺส วจนํ น กตนฺติ ปริเทวนฺโต เคหํ อคมาสิ ฯ อาลมฺพายโนปิ ทิพฺโพสเถหิ อตฺตโน สรีรํ มกฺเขตฺวา โถกํ ขาทิตฺวา อตฺตโน กายํ ปริภาเวตฺวา ทิพฺพมนฺตํ ชปฺปนฺโต โพธิสตฺตํ อุปสงฺกมิตฺวา นงฺคุฏฺเฐ นํ คเหตฺวา อากฑฺฒิตฺวา สีสํ ทฬฺหํ คณฺหนฺโต มุขมสฺส วิวริตฺวา โอสถํ ขาทิตฺวา มุเข สเขลํ โอสิญฺจิ ฯ สุจิชาติโก นาคราชา สีลเภทภเยน อกุชฺฌิตฺวา อกฺขีนิ น อุมฺมิเลสิ ฯ อถ นํ โอสถมนฺตํ กตฺวา นงฺคุฏฺเฐ นํ คเหตฺวา เหฏฺฐาสีสํ กตฺวา สญฺจาเลตฺวา คหิตโคจรํ ฉฑฺฑาเปตฺวา ภูมิยํ ทีฆโต นิปชฺชาเปตฺวา มสุรกํ มทฺทนฺโต วิย ปาเทหิ มทฺทิ ฯ อฏฺฐีนิ จุณฺณิยมานานิ วิย อเหสุํ ฯ ปุน นงฺคุฏฺเฐ นํ คเหตฺวา เหฏฺฐาสีสํ กตฺวา ทุสฺสํ

โปเถนฺโต วิย โปเถสิ ฯ มหาสตฺโต เอวรูปํ ทุกฺขํ อนุภวนฺโตปิ เนว กุชฺฌิ ฯ

ตมตฺถํ ปกาเสนฺโต สตฺถา อาห

อโถสเถหิ ทิพฺเพหิ ชปฺปํ มนฺตปทานิ จ