ฯ อาลมฺพายนกณฺฑํ นิฏฺฐิตํ ฯ

อาลมฺพายเนน ปน โพธิสตฺตสฺส คหิตทิวเสเยว มหาสตฺตสฺส มาตา สุปินนฺตเร กาเฬน รตฺตกฺขินา ปุริเสน อสินา ทกฺขิณพาหุํ ฉินฺทิตฺวา โลหิเตน ปกฺฆรนฺเตน นียมานํ อทฺทส ฯ สา ปพุชฺฌิตฺวา ภีตตสิตา อุฏฺฐาย ทกฺขิณพาหํ ปรามสิตฺวา สุปินภาวํ ชานาติ ฯ อถสฺสา เอตทโหสิ มยา กกฺขโล ปาปสุปิโน ทิฏฺโฐ จตุนฺนํ วา เม ปุตฺตานํ ธตรฏฺฐสฺส รญฺโญ วา มม วา ปริปนฺเถน ภวิตพฺพนฺติ ฯ อปิจ โข ปน มหาสตฺตเมว อารพฺภ อธิกตรํ จินฺเตสิ ฯ กึ การณา ฯ เสสา อตฺตโน นาคภวเน วสนฺติ ฯ อิตโร ปน สีลชฺฌาสยตาย มนุสฺสโลกํ คนฺตฺวา อุโปสถกมฺมํ กโรติ ตสฺมา กจฺจิ นุ โข เม ปุตฺตํ อหิตุณฺฑิโก วา สุปณฺโณ วา คณฺเหยฺยาติ ตสฺเสว อธิกตรํ จินฺเตสิ ตโต อฑฺฒมาเส อติกฺกนฺเต มม ปุตฺโต อฑฺฒมาสํ อติกฺกมฺม มํ วินา วตฺติตุํ น สกฺโกติ อทฺธาสฺส กิญฺจิ ภยํ อุปฺปนฺนํ ภวิสฺสตีติ โทมนสฺสปฺปตฺตา อโหสิ ฯ มาสาติกฺกเม ปนสฺสา โสเกน อสฺสูนํ อปคฺฆรณเวลา นาโหสิ หทยํ สุสฺสิ อกฺขีนิ อุปกฺกิตานิ ฯ สา อิทานิ อาคมิสฺสติ อิทานิ อาคมิสฺสตีติ ตสฺสาคมนมคฺคเมว โอโลเกนฺตี นิสีทิ ฯ อถสฺสา เชฏฺฐปุตฺโต สุทสฺสโน นาม มาสจฺจเยน มหติยา ปริสาย มาตาปิตูนํ ทสฺสนตฺถาย อาคโต ปริสํ พหิ ฐเปตฺวา ปาสาทํ อารุยฺห มาตรํ วนฺทิตฺวา เอกมนฺตํ อฏฺฐาสิ ฯ สา ภูริทตฺตํ อนุโสจนฺตี เตน สทฺธึ น กิญฺจิ สลฺลปติ ฯ โส จินฺเตสิ มยฺหํ มาตา มยิ ปุพฺเพ อาคเต ทิสฺวา ตุสติ ปฏิสนฺถารํ กโรติ อชฺช ปน โทมนสฺสปฺปตฺตา กึ นุ โข การณนฺติ ฯ อถ นํ ปุจฺฉนฺโต อาห

มมํ ทิสฺวาน อายนฺตํ สพฺพกามสมิทฺธินํ

อินฺทฺริยานิ อหฏฺฐานิ สาวํ ๑- ชาตํ มุขํ ตว