หนฺททานิ คมิสฺสาม ภูริทตฺตนิเวสนํ

ธมฺมฏฺฐํ สีลสมฺปนฺนํ ปสฺสาม ตว ภาตรนฺติ ฯ

ตตฺถ สมฺผุลฺลาติ สุวณฺณาลงฺการธาริตาย สมฺผุลฺลา กณิการา วิย ฯ หนฺทาติ อุปสคฺคตฺเถ ๑- นิปาโต ฯ เอหิ ตาต ภูริทตฺตสฺส นิเวสนํ คจฺฉามาติ วทติ ฯ

เอวญฺจ ปน วตฺวา ตสฺส เจว อตฺตโน จ ปริสาย สทฺธึ ตตฺถ อคมาสิ ฯ ภูริทตฺตสฺส ภริยาโย ปน ตํ วมฺมิกมตฺถเก อทิสฺวา มาตุ นิเวสเน ภวิสฺสตีติ อพฺยาวตา อเหสุํ ฯ ตา สสฺสุ กิร อตฺตโน ปุตฺตํ อปสฺสนฺตี อาคจฺฉตีติ สุตฺวา ปจฺจุคฺคมนํ กตฺวา อยฺเย ปุตฺตสฺส เต อทิสฺสนฺตสฺส อชฺช มาโส อติกฺกนฺโตติ