กตาหุ เอเต วสินาติ อาหูติ ฯ

ตตฺถ อุปาคูติ อุปาคตา ฯ พฺรหฺมา กิร พฺราหฺมณาทโย จตฺตาโร วณฺเณ นิมฺมินิตฺวา อริเย ตาว พฺราหฺมเณ อาห ตุมฺเห อชฺเฌนเมว อุปคจฺฉถ มา อญฺญํ กิญฺจิ กริตฺถาติ ฯ ชนินฺเท อาห ตุมฺเห ปฐวิญฺเญว ชินิตฺถ มา อญฺญํ กิญฺจิ กริตฺถาติ ฯ เวสฺเส อาห ตุมฺเห กสึเยว อุปคจฺฉถาติ ฯ สุทฺเท อาห ตุมฺเห ติณฺณํ วณฺณานํ ปาริจริยํเยว อุเปถาติ ฯ ตโต ปฏฺฐาย อริยา อชฺเฌนํ ชนินฺทา ปฐวึ เวสฺสา กสึ สุทฺทา ปาริจริยํ อุปคตาติ วทนฺติ ฯ ปจฺเจกํ ยถาปเทสนฺติ อุปคจฺฉนฺตา จ ปาฏิเยกฺกํ อตฺตโน กุลปฺปเทสานุรูเปน พฺรหฺมุนา วุตฺตนิยาเมเนว อุปคตา ฯ กตาหุ เอเต วสินาติ อาหูติ เอวํ กิร เต วสินา มหาพฺรหฺมุนา กตา อเหสุนฺติ กเถนฺติ ฯ

เอวํ มหาคุณา เอเต พฺราหฺมณา นาม โย หิ เอเตสุ จิตฺตํ ปสาเทตฺวา ทานํ เทติ ตสฺส อญฺญตฺถ ปฏิสนฺธิ นตฺถิ เทวโลกเมว คจฺฉตีติ วตฺวา อาห

ธาตา วิธาตา วรุโณ กุเวโร