เอเต หิ ธมฺมา อนริยรูปา

กมฺโพชกานํ วิตถา พหูนนฺติ ฯ

ตตฺถ เวทชฺฌคตาริฏฺฐาติ อริฏฺฐ อิทานิ เวทาธิคมานิ นาม ธีรานํ ปราชยสํขาโต กลิคฺคาโห มคานํ พาลานํ ชยสํขาโต กตคฺคาโห ฯ มรีจิธมฺมนฺติ อิทํ หิ เวทตฺตยํ มรีจิธมฺมํ ฯ ตยิทํ อสเมกฺขิตตฺตา ยุตฺตายุตฺตํ อชานนฺตา พาลา อุทกสญฺญาย มิคา มรีจึ วิย ภูตสญฺญาย อนวชฺชสญฺญาย อตฺตโน วินาสํ อุปคจฺฉนฺติ ฯ นาติวหนฺติ ปญฺญนฺติ เอวรูปา ปน มายา โกฏฺฐาสา ปญฺญํ ปญฺญาสมฺปนฺนํ ปุริสํ นาติวหนฺติ น วญฺเจนฺติ ฯ ภวนฺติรสฺสาติ รกาโร พฺยญฺชนสนฺธิ อสฺส ฯ ภูนหุโนติ วุฑฺฒิฆาตกสฺส มิตฺตทุพฺภิโน นรสฺส เวทา ตาณตฺถาย น ภวนฺติ ฯ ปติฏฺฐา โหตุํ น สกฺโกนฺตีติ อตฺโถ ฯ ปริจิณฺโณว อคฺคีติ อคฺคิ วา ปริจณฺโณ ฯ โทสนฺตรนฺติ ติวิเธน ทุจฺจริตโทเสน สโทสจิตฺตํ ปาปกมฺมํ ปุริสํ น ตายติ น รกฺขติ ฯ สพฺพญฺจ มจฺจาติ สเจปิ หิ มจฺจา ยตฺตกํ โลเก ทารุ อตฺถิ สพฺพํ ตํ สธนา สโภคา อตฺตโน ธเนน จ โภเคน จ สทฺธึ ติเณน มิสฺสํ กตฺวา อาทิเปยฺยุํ ฯ เอวํ สพฺพํปิ ตํ เตหิ อาทิปิตํ ทหนฺโต อยํ อสมตฺถเตโช อสทิสเตโช ตว อคฺคิ น ตปฺเปยฺย เอวํ อตปฺปนียํ ภาติก ฯ ทิรสญฺญูติ ทฺวีหิ ชิวฺหาหิ รสชานนสมตฺถ โก ตํ สปฺปิอาทีหิ สุภิกฺขํ วา สุหิตํ วา ฯ กิริยาติ กเรยฺย โก สกฺกุเณยฺย กาตุํ ฯ เอวํ อติตฺตํ ปน เอตํ มหคฺฆสํ สนฺตปฺเปตฺวา โก นาม เทวโลกํ คมิสฺสติ ปสฺส ยาวญฺเจตํ ทุกฺกถิตนฺติ ฯ โยคยุตฺโตติ อรณิมถนโยเคน ยุตฺโต หุตฺวา ตํ ปจฺจยํ ลภิตฺวาว สมาโรหติ นิพฺพตฺตติ ฯ เอวํ ปรวายาเมน อุปฺปชฺชมานํ อเจตนํ ตํ ตฺวํ เทโวติ วทสิ ฯ อิทํปิ อภูตเมว กเถสีติ ฯ อคฺคิมนุปฺปวิฏฺโฐติ อคฺคิ อนุปฺปวิฏฺโฐ ฯ นามตฺถมาโนติ นาปิ อรณิหตฺเถน นเรน อมตฺถิยมาโน นิพฺพตฺติ ฯ นากมฺมุนา ชายติ ชาตเวโทติ น ชาตเวทตฺถิกสฺส ปุริสสฺส กิริยํ วินา อตฺตโน ธมฺมตายเยว ชายติ ฯ สุสฺเสยฺยุนฺติ อนฺโต อคฺคินา โสสิยมานานิ วนานิ สุสฺเสยฺยุํ อลฺลาเนว สุสฺเสยฺยุํ ฯ โภชนฺติ โภเชนฺโต ฯ ธูมสิขึ ปตาปวนฺติ ธูมสิขาย ยุตฺตํ ปตาปวนฺตํ ฯ องฺคาริกาติ องฺคารการกา ฯ โลณกราติ โลโณทกํ ปจิตฺวา โลณการกา ฯ สูทาติ ภตฺตการกา ฯ สรีรทาหาติ มตสรีรชฺฌาปกา ฯ ปุญฺญนฺติ เอเตปิ สพฺเพ ปุญฺญเมว กเรยฺยุํ ฯ อชฺเฌนมคฺคินฺติ อชฺเฌนํ อคฺคึ มนฺตชฺฌายกา พฺราหฺมณาปิ โหนฺตุ ฯ โกจิ นโร ธูมสิขึ ปตาปวนฺตํ อคฺคึ โภเชนฺโต ตปฺปยิตฺวาปิ ปุญฺญํ น กโรติ นาม ฯ โลกาปจิโต สมาโนติ ตว เทโว โลกสฺส อปจิโต ปูชิโต สมาโน ฯ ยเทวาติ ยํ อหิกุณปาทึ ปฏิกุลํ เชคุจฺฉํ มจฺจา ทูรโตปริวชฺชยนฺติ ฯ ตทปฺปสฏฺฐนฺติ ตํ อปฺปสฏฺฐํ สมฺม ทิรสญฺญุ กถํ เกน การเณน ปริภุญฺเชยฺย ฯ เทเวสูติ เอเก มนุสฺสา สิขึ เทเวสุ อญฺญตรํ เทวํ วทนฺติ ฯ มิลกฺขู ปนาติ อญฺญาณา ปน มิลกฺขู อุทกํ เทโวติ วทนฺติ ฯ อสญฺญกายนฺติ อนินฺทฺริยพทฺธํ อจิตฺตกายํ สมานํ เอตํ อเจตนํ ปชานํ ปจนาทิกมฺมกรํ เวสฺสานรํ อคฺคึ ปริจริตฺวา ปาปานิ กมฺมานิ กโรนฺโต โลโก กถํ สุคตึ คมิสฺสติ ฯ อิทํ เต อติวิย ทุกฺกถิตํ ฯ สพฺพาภิภูตาหุธ ชีวิกตฺถาติ อิเม พฺราหฺมณา อตฺตโน ชีวิกตฺถํ มหาพฺรหฺมา สพฺพาภิภูติ อาหํสุ ฯ สพฺโพ โลโก เตเนว นิมฺมิโตติ วทนฺติ ฯ ปุน อคฺคิสฺส พฺรหฺมา ปริจาริโกติ วทนฺติ ฯ โสปิ กิร อคฺคึ ชูหเตว ฯ สพฺพานุภาวี จ วสีติ โส ปน ยทิ สพฺพานุภาวี จ วสี จ อถ กิมตฺถํ สยํ อนิมฺมิโต หุตฺวา อตฺตนาว นิมฺมิตํ ฯ วนฺทิตสฺสาติ วนฺทิโต ภเวยฺย อิทํปิ เต ทุกฺกถิตเมว ฯ หาสนฺติ อริฏฺฐ พฺราหฺมณานํ วจนํ นาม หสิตพฺพยุตฺตกํ ปณฺฑิตานํ นิชฺฌานํ น ขมติ ฯ ปริกรึสูติ อิเม พฺราหฺมณา เอวรูปํ มุสาวาทํ อตฺตโน สกฺการเหตุ ปุพฺเพ ปตฺถรึสุ ฯ สนฺธาภิตา ชนฺตูภิ สนฺติธมฺมนฺติ เอเต เอตฺตเก ลาภสกฺกาเร อปาตุภูเต ชนฺตูหิ สทฺธึ โยเชตฺวา ปาณวธปฏิสํยุตฺตํ อตฺตโน ลทฺธิธมฺมปสํขาตํ สนฺติธมฺมํ สนฺธาภิตา ยญฺญสุตฺตํ นาม คนฺถยึสูติ อตฺโถ ฯ เอตญฺเจ สจฺจนฺติ ยเทตํ ตยา อชฺเฌนมริยาติ อาทิ วุตฺตํ เอตํ เจ สจฺจํ ภเวยฺย ฯ นาขตฺติโยติ เอวํ สนฺเต อขตฺติโย รชฺชํ นาม น ลเภยฺย อพฺราหฺมโณปิ มนฺตปทานิ น สิกฺเขยฺย ฯ มุสาวิเมติ มุสาว อิเม ฯ โอทริยาติ อุทรนิสฺสิตชีวิกา อุทรปูรณเหตุ วา ฯ ตทปฺปปญฺญาติ ตํ เตสํ วจนํ อปฺปปญฺญา ฯ อตฺตนา วาติ ปณฺฑิตา ปน เตสํ วจนํ สโทสนฺติ อตฺตนาว ปสฺสนฺติ น สทฺทหนฺติ ฯ ตํ ตาทิสนฺติ ตํ ตถารูปํ ฯ สํขุภิตนฺติ สํขุภิตฺวา พฺรหฺมุนา ฐปิตมริยาทํ ภินฺทิตฺวา ฐิตํ สํขุภิตํ วิภินฺนํ โลกํ โส ตว พฺรหฺมา กสฺมา อุชุํ น กโรติ ฯ อลกฺขินฺติ กึ การณา สพฺพโลเก ทุกฺขํ วิทหิ ฯ สุขนฺติ กึ น เอกนฺตสุขเมว สพฺพโลกมกาสิ โลกวินาสโก โจโร มญฺเญ ตว พฺรหฺมาติ ฯ มายาติ มายาย ฯ อธมฺเมน กิมตฺถการีติ อิมินา มายาทินา อธมฺเมน กึ การณา สพฺพโลกํ อนตฺถการี นิรตฺถสํโยชยีติ อตฺโถ ฯ อริฏฺฐาติ อริฏฺฐ ตว ภูตปติ อธมฺมิโก โย ทสวิเธ กุสลธมฺเม สติ ธมฺมเมว อวิทหิตฺวา อธมฺมํ วิทหิ ฯ กีฏาติ อาทีสุ อุปโยคตฺเถ ปตฺจตฺตวจนํ ฯ เอเต กีฏาทโย ปาเณ หนฺตฺวา มจฺโจ สุชฺฌติ สคฺคํ อุเปติ เอเต หิ กมฺโพชกรฏฺฐวาสีนํ พหูนํ อนริยานํ ธมฺมา ฯ เต ปน วิตถา อธมฺมา ธมฺมาติ วุตฺตา ฯ เตหิ ตว พฺรหฺมุนา นิมฺมิเตหิ ภวิตพฺพนฺติ ฯ