ตตฺถ โภวาทีติ พฺราหฺมณา ฯ โภวาทินมารเภยฺยุนฺติ พฺราหฺมณเมว มาเรยฺยุํ ฯ เยวาปีติ เย วาปิ พฺราหฺมณานํ ตํ วจนํ สทฺทเหยฺยุํ ฯ เต อตฺตโน อุปฏฺฐาเกเยว พฺราหฺมณา มาเรยฺยุํ พฺราหฺมณา ปน พฺราหฺมเณ จ อุปฏฺฐาเก จ อมาเรตฺวา นานปฺปกาเร ติรจฺฉาเนเยว มาเรนฺติ อิติ เนสํ วจนํ มิจฺฉา ฯ เกจีติ ยญฺเญสุ โน มาเรถ มยํ สคฺคํ คมิสฺสามาติ อายาจนฺตา เกจิ นตฺถิ ฯ ปาเณ ปสุมารภนฺตีติ มิคาทโย ปาเณ จ ปสุญฺจ วิปฺผนฺทมาเน ชีวิกตฺถาย มาเรนฺติ ฯ มุขํ นยนฺตีติ เอเตสุ ยูปุสฺสาปเนสุ ปสุพนฺเธสุ อิมสฺมึ เต ยูเป สพฺพํ สนฺตกํ มณิสํขมุตฺตํ ธนธญฺญรชตชาตรูปํ สนฺนิหิตํ อยนฺเต ปรตฺถ กามทุโห ภวิสฺสติ สสฺสตภาวํ อาวหิสฺสตีติ จิเตฺรหิ การเณหิ มุขํ ปสาเรนฺติ ตํ ตํ วตฺวา มิจฺฉาคาหํ คาหยนฺตีติ อตฺโถ ฯ สเจ จาติ สเจ ยูเป วา เสสกฏฺเฐสุ วา เอตํ มณิอาทิกํ ลเภยฺย ติทิเว วา สพฺพกามทุโห อสฺส เตวิชฺชสํฆา ปุถู หุตฺวา ยญฺญํ ยเชยฺยุํ พหุทฺธนตาย เจว สคฺคกามตาย จ อญฺญํ อพฺราหฺมณํ น ยาเชยฺยุํ ยสฺมา ปน อตฺตโน ธนํ ปจฺจาสึสนฺตา อญฺญํปิ ยาเชนฺติ ตสฺมา อภูตวาทิโนติ เวทิตพฺพา ฯ กุโต จาติ เอตสฺมึ ยูเป วา เสสกฏฺเฐสุ วา กุโต เอตํ มณิอาทิกํ อวิชฺชมานเมว กุโต ติทิเว สพฺพกาเม ทุหิสฺสติ ฯ สพฺพถาปิ อภูตเมว เตสํ วจนํ ฯ สฐา จ ลุทฺทา จ ปลุทฺธพาลาติ อริฏฺฐ อิเม พฺราหฺมณา นาม เกราฏิกา เจว นิกฺกรุณา จ ฯ เต พาลา โลกํ ปโลเภตฺวา อุปลาเปตฺวา วิจิเตฺรหิ การเณหิ มุขํ ปสาเรนฺติ ฯ สพฺพกาเมติ อคฺคึ อาทาย ตวญฺจ ชูห อมฺหากญฺจ วิตฺตํ เทหิ ฯ ตโต สุขีติ สพฺพกาเม ลภิตฺวา สุขิโต โหหีติ ฯ ตมคฺคิหุตฺตํ สรณํ ปวิสฺสาติ ตํ ราชานํ ราชมหามตฺตํ วา อาทาย อคฺคิชูหนฏฺฐา นเคหํ ปวิสิตฺวา ฯ โอโรปยิตฺวาติ วิจิตฺรานิ การณานิ วทนฺตา เกสมสฺสุญฺจ นเข จ โอโรปยิตฺวา ฯ อติคาฬฺหยนฺตีติ วุตฺตตาย ตโย เวเท นิสฺสาย อิทํ ทาตพฺพํ อิทํ กาตพฺพนฺติ วทนฺตา เวเทหิ ตสฺส สนฺตกํ วิตฺตํ อติคาฬฺหยนฺติ วินาเสนฺติ วิทฺธํเสนฺติ ฯ อนฺนานิ โภตฺวา กุหกา กุหิตฺวาติ เต กุหกา นานปฺปการํ กุหกกมฺมํ กตฺวา สเมจฺจ สมาคนฺตฺวา ยญฺญํ วณฺเณตฺวา ทายกํ วญฺเจตฺวา ตสฺส สนฺตกํ นานคฺครสโภชนํ ภุญฺชิตฺวา อถ นํ มุณฺฑํ กตฺวา ยญฺญปเถ โอสชฺชนฺติ ฯ คเหตฺวา พหิ ยญฺญาวาฏํ คจฺฉนฺตีติ อตฺโถ ฯ โยคโยเคนาติ เต พฺราหฺมณา ตํ เอกํ พหุกา สเมจฺจ เตน เตน โยเคน ตาย ตาย ยุตฺติยา วิลุมฺปมานา ทิฏฺฐํ ปจฺจกฺขํ ตสฺส ธนํ อทิฏฺเฐน เทวโลเกน อทิฏฺฐํ เทวโลกํ วณฺเณตฺวา อมรฏฺฐานํ กตฺวา หรนฺติ ฯ อกาสิยา ราชูหิ วานุสิฏฺฐาติ อิทญฺจ อิทญฺจ มม พลึ คณฺหถาติ ราชูหิ วา ราชมหามตฺเตหิ วา อนุสิฏฺฐา อกาสิยสํขาตา ราชปุริสา วิย ฯ ตทสฺสาติ ตํ อสฺส ธนํ อาทาย หรนฺติ ฯ โจรสมาติ อภูตพลิคฺคาหกา สนฺธิจฺเฉทกโจรสทิสา ฯ วชฺฌาติ วธารหา เอวรูปา ปาปธมฺมา อิเม โลเก น หญฺญนฺติ ฯ พาหารสีติ พาหา อสิ ฯ อิทํ วุตฺตํ โหติ อิทํปิ อริฏฺฐ พฺราหฺมณานํ มุสาวาทํ ปสฺส เต กิร ยญฺเญสุ มหตึ ปลาสยฏฺฐึ อินฺทสฺส พาหาสิ ทกฺขิณาติ วตฺวา ฉินฺทนฺติ ตญฺเจ เตสํ วจนํ สจฺจํ อถ ฉินฺนพาหุ สมาโน เกนสฺสุ พาหุพเลน อินฺโท อสุเร ชินาติ ฯ สมงฺคีติ พาหุสมงฺคี อจฺฉินฺนพาหุ อโรโคเยว ฯ หนฺตฺวาติ อสุรานํ หนฺตวา ฯ ปรโมติ อุตฺตโม ปุญฺญิทฺธิยา สมนฺนาคโต อญฺเญสํ อวชฺโฌ ฯ พฺราหฺมณาติ พฺราหฺมณานํ มนฺตา ฯ ตุจฺฉรูปาติ ตุจฺฉสภาวา นิปฺผลา ฯ วญฺจนาติ เย จ เตสํ พฺราหฺมณานํ มนฺตา นาม เอสา โลเก สนฺทิฏฺฐิกา วญฺจนา ฯ ยถาปการานีติ ยาทิสานิ อิฏฺฐกานิ คเหตฺวา ยญฺญกเรหิ จิตฺยา กตาติ วทนฺติ ฯ ทิฏฺฐเสลาติ ปพฺพตา หิ อจลา ทิฏฺฐา อนุปจิตา เอกฆนา สิลามยา จ น อญฺญาทิสา อิฏฺฐกานิ จลานิ น เอกฆนานิ น สิลามยานิ ฯ ปริวณฺณยนฺตาติ เอตํ ยญฺญํ วณฺเณตฺวา พฺราหฺมณา ฯ สมนฺตเวเทติ ปริปุณฺณเวเท พฺราหฺมเณ ฯ วหนฺตีติ โสเตสุปิ อาวฏฺเฏสุปิ ปติเต นทิโย วหนฺติ นิมุชฺชาเปตฺวา ชีวิตกฺขยํ ปาเปนฺติ ฯ น เตน พฺยาปนฺนรสูทกานีติ เอตฺถ เอโก นกาโร สํปุจฺฉนตฺเถ นิปาโต โหติ ฯ นนุ เตน พฺยาปนฺนรสูทกา นทิโยติ หิ ตํ ปุจฺฉนฺโต เอวมาห ฯ กสฺมาติ เกน การเณน ตาต มหาสมุทฺโทว อเปยฺโย กโต กึ มหาพฺราหฺมา ยมุ นาทีสุ นทีสุอุทกํ อเปยฺยํ กาตุํ น สกฺโกติ มหาสมุทฺเทเยว สกฺโกตีติ ฯ ทิรสญฺญุราหูติ ทิรสญฺญุ อหุ ชาโตติ อตฺโถ ฯ ปุเร ปุรตฺถาติ อิโต ปุเร สพฺพปุรตฺถา ปฐมกปฺปกาเล ฯ กา กสฺส ภริยาติ กา กสฺส ภริยา นาม ฯ ตทา หิ ปุริสิตฺถีลิงฺคเมว นตฺถิ ปจฺฉา เมถุนธมฺมวเสน มาตาปิตโร นาม ชาตา ฯ มโน มนุสฺสนฺติ ตทา หิ มโนเยว มนุสฺสํ อชเนสิ ฯ มโนมยาว สตฺตา นิพฺพตฺตึสูติ อตฺโถ ฯ เตนาปิ ธมฺเมนาติ เตนาปิ การเณน เตน สภาเวน โกจิ ชาติยา หีโน นาม นตฺถิ น หิ ตทา ขตฺติยาทิเภโท อตฺถิ ตสฺมา ยํ พฺราหฺมณา วทนฺติ พฺราหฺมณาว ชาติยา เสฏฺฐา อิตเร หีนาติ ตํ มิจฺฉา ฯ เอวํปีติ เอวํ วตฺตมาเน โลเก โปราณกวตฺตํ ชหิตฺวา ปจฺฉา อตฺตนา ปริจฺฉินฺทิตฺวา กตานํ วเสน ขตฺติยาทโย จตฺตาโร โกฏฺฐาสา ชาตา ฯ เอวํปิ โวสฺสคฺควิภงฺคมาหูติ อตฺตนา กเตหิ กมฺมโวสฺสคฺเคหิ เตสํ สตฺตานํ เอกจฺเจ ขตฺติยา ชาตา เอกจฺเจ พฺราหฺมณาทโยติ อิมํ วิภาคํ กเถนฺติ ตสฺมา พฺราหฺมณาว เสฏฺฐาติ วจนํ มิจฺฉาว ฯ สตฺตธาติ ยทิ มหาพฺรหฺมุนา พฺราหฺมณานญฺเญว ตโย เวทา ทินฺนา น อญฺเญสํ จณฺฑาลสฺส มนฺเต ภาสนฺตสฺส มุทฺธา สตฺตธา ผเลยฺย น จ ผลติ ตสฺมา อิเมหิ พฺราหฺมเณหิ อตฺตวธาย มนฺตา กตา อตฺตโนเยว เนสํ มุสา วาทิตํ ปกาเสนฺตา คุณวธํ กโรนฺติ ฯ วาจา กตาติ เอเต มนฺตา นาม มุสาวาเทน จินฺเตตฺวา กตา ฯ คิทฺธิ กตา คหิตาติ ลาภคิทฺธิกตาย พฺรหฺมเณหิ คหิตา ฯ ทุมฺโมจยาติ มจฺเฉน คิลิตพลิสา วิย ทุมฺโมจยา ฯ กาพฺยาปถานุปนฺนาติ กาพฺยการกพฺราหฺมณานํ ตํ วจนปถํ อนุปนฺนา อนุคตา ฯ เตหิ ยถา อิจฺฉนฺติ ตถา มุสาวาทํ วตฺวา พนฺธา ฯ พาลานนฺติ เตสํ หิ พาลานํ จิตฺตํ วิสเม นิวิฏฺฐํ ฯ ตํ อญฺเญ อปฺปปญฺญา สทฺทหนฺติ ฯ โปริสยพเลนาติ โปริสยสํขาเตน พเลน ฯ อิทํ วุตฺตํ โหติ ยํ เอเตสํ สีหาทีนํ ปุริสถามสํขาตํ โปริสยพลํ เตน พเลน สมนฺนาคโต พฺราหฺมโณ นาม นตฺถิ สพฺเพ อิเมหิ ติรจฺฉาเนหิปิ หีนาเยว ฯ มนุสฺสภาโว จ ควํว เปกฺโขติ อปิ จ โย เอเตสํ มนุสฺสภาโว โส คุนฺนํ วิย เปกฺขิตพฺโพ ฯ กึ การณาติ ฯ ชาติ หิ เตสํ อสมา สมานนฺติ เตสํ พฺราหฺมณานํ ทุปฺปญฺญตาย เตหิ สทฺธึ สมานํ ชาติเยว อสมา อญฺญเมว หิ คุนฺนํ สณฺฐานํ อญฺญํ เอเตสนฺติ เอเต พฺราหฺมเณ ติรจฺฉาเนสุ สีหาทีสุ สเมปิ อกตฺวา โครูปสเมว กโรติ ฯ สเจ จ ราชาติ อริฏฺฐ ยทิ มหาพฺราหฺมุนา ทินฺนภาเวน ขตฺติโยว ปฐวึ วิชิตฺวา ฯ สชีววาติ สห ชีวีหิ อมจฺเจหิ สมนฺนาคโต ฯ อสฺสวา ปาริสชฺโชติ อตฺตโน โอวาทการกปริสาวจโร สิยา อถสฺส ปริสาย ยุชฺฌิตฺวา รชฺชํ ทาตพฺพํ นาม น ภเวยฺย สยเมว โส เอกโกว สตฺตุสํฆํ วิเชยฺย ฯ เอวํ สติ ยุทฺเธ ทุกฺขาภาเวน ตสฺส ปชา นิจฺจํ สุขี ภเวยฺย เอตญฺจ สจฺจํ นตฺถิ ตสฺมาปิ เตสํ วจนํ มิจฺฉา ฯ ขตฺติยมนฺตาติ ราชสตฺถญฺจ ตโย จ เวทา อตฺตโน อาณาย รุจิยา อิทเมว กตฺตพฺพนฺติ ปวตฺตนฺตา อตฺเถน เอเตา สมกา ภวนฺติ ฯ อวินิจฺฉินิตฺวาติ เตสํ ขตฺติยมนฺตานํ ขตฺติโยปิ เวทานํ พฺราหฺมโณปิ อตฺถํ อวินิจฺฉินิตฺวา อาณาวเสเนว คณฺหนฺโต ตํ อตฺถํ อุทโกเฆน ฉนฺนํ มคฺคํ วิย น พุชฺฌติ ฯ อตฺเถน เอเตติ วญฺจนตฺเถน เอเต สมกา ภวนฺติ ฯ กึ การณา ฯ พฺราหฺมณา หิ พฺราหฺมณาว เสฏฺฐา อญฺเญ วณฺณา หีนาติ วทนฺติ เย จ เต ลาภาทโย โลกธมฺมา สพฺเพ เต สพฺเพสํปิ จตุนฺนํ วณฺณานํ ธมฺมา เอกสตฺโตปิ หิ เอเตหิ มุตฺตโก นาม นตฺถิ ฯ อิติ พฺราหฺมณา โลกธมฺเมหิ อปริมุตฺตาว สมานา เสฏฺฐา มยนฺติ มุสาวาทํ กเถนฺติ ฯ อิพฺภาติ คหปติกา ฯ เตวิชฺชสํฆาปีติ พฺราหฺมณาปิ ตเถว ปุถูนิ กสิโครกฺขาทีนิ กมฺมานิ กโรนฺติ ฯ นิจฺจุสฺสุกาติ นิจฺจํ อุสฺสุกฺกชาตา ฉนฺทชาตา ฯ ตทปฺปปญฺญา ทิรสญฺญุรา เตติ ตสฺมา ภาติก ทิรสญฺญุ นิปฺปญฺญา พฺราหฺมณา อารกา เต ธมฺมโต โปราณกา หิ พฺราหฺมณธมฺมา เอตรหิ สุนเขสุ สนฺทิสฺสนฺตีติ ฯ