เอวํ มหาสตฺโต เตสํ วาทํ ภินฺทิตฺวา อตฺตโน วาทํ ปติฏฺฐาเปสิ ฯ ตสฺส ธมฺมกถํ สุตฺวา สพฺเพ เต นาคปริสา โสมนสฺสชาตา อเหสุํ ฯ มหาสตฺโตปิ เนสาทพฺราหฺมณํ นาคภวนา นีหราเปตฺวา ปริภาสนมตฺตํปิ ปนสฺส นากาสิ ฯ

ยญฺญเภทกณฺฑํ นิฏฺฐิตํ ฯ

สาครพฺรหฺมทตฺโตปิ ฐปิตทิวสํ อนติกฺกมิตฺวา จตุรงฺคินิยา เสนาย ปริวุโต ปิตุ วสนฏฺฐานํ อคมาสิ ฯ มหาสตฺโตปิ มาตุลญฺจ อยฺยกญฺจ ปสฺสิสฺสามาติ เภริญฺจาราเปตฺวา มหนฺเตน สิริโสภคฺเคน ยมุนาโต อุตฺตริตฺวา ตเมว อสฺสมปทํ อารพฺภ ปายาสิ ฯ อวเสสภาตโร จสฺส มาตาปิตโร จ ปจฺฉโต ปายึสุ ฯ ตสฺมึ ขเณ สาครพฺรหฺมทตฺโต มหาสตฺตํ มหติยา ปริสาย อาคจฺฉนฺตํ ทิสฺวา อสญฺชานิตฺวา ปิตรํ ปุจฺฉนฺโต อาห

กสฺส เภริ มุทิงฺคา จ สํขา ปณวเทณฺฑิมา