เต รญฺโญ กถํ สุตฺวา ราชปุตฺเต อาทึ กตฺวา สพฺพนฺตํ ปกฺขิปริโยสนํ ปาณคณํ วิสชฺเชสุํ ฯ กณฺฑหาโลปิ ยญฺญาวาเฏ กมฺมํ สํวิทหติ ฯ อถ นํ เอโก ปุริโส อเร ทุฏฺฐ กณฺฑหาล รญฺญา ปุตฺตธีตโร วิสชฺชิตา ตฺวํ อตฺตโน ปุตฺตทาเร มาเรตฺวา เตสํ คลโลหิเตน ยญฺญํ ยชิสฺสสีติ อาห ฯ โส กึ นาเมตํ รญฺญา กตนฺติ กปฺปุฏฺฐานอคฺคิ วิย อวตฺถรนฺโต อุฏฺฐาย ตุริโต ธาวิตฺวา เวเคนาคนฺตฺวา อาห

ปุพฺเพว เมสิ วุตฺโต ทุกฺกรํ ทุรภิสมฺภวํ เจตํ

อถ โน อุปกฺขตสฺส ยญฺญสฺส กโรสิ วิกฺเขปํ

สพฺเพ วชฺชนฺติ สุคตึ เยปิ ยชนฺติ เยปิ เจว ยชาเปนฺติ