อลงฺกโต สุนฺทรโก ปุตฺโต ตว เทว สุขุมาโล

หนฺทยฺย มํ หนสฺสุ สโสกา จนฺทิเยน เหสฺสามิ

ปุญฺญํ กรสฺสุ วิปุลํ วิจราม อุโภ ปรโลเกติ ฯ

ตตฺถ ปฐมนฺติ เทว มม สามิกโต ปฐมตรํ มํ ฆาเตหิ ฯ ทุกฺขนฺติ ตํ จนฺทสฺส มรณทุกฺขํ มม หทยํ มา อผาเลสิ ฯ อลงฺกโตติ อยํ มม เอโกว อลงฺกตปฏิยตฺโตติ เอวํ อลงฺกโต เอวรูปํ นาม ปุตฺตํ น มมายสิ มหาราชาติ ทีเปติ ฯ หนฺทยฺยาติ หนฺท อยฺย ฯ ราชานํ อาลปนฺตี เอวมาห ฯ สโสกาติ จนฺทิเยน สทฺธึ สโสกา ฯ เหสฺสามีติ ภวิสฺสามิ ฯ วิจราม อุโภ ปรโลเกติ ตยา เอกโตว ฆาติตา อุโภปิ ปรโลเก สุขํ อนุภวนฺตา วิจราม มา โน สคฺคนฺตรายมกาสีติ ฯ