วิลสตํปิ มํ กตฺวา ยชสฺสุ สตฺตธา มหาราช

มา เชฏฺฐปุตฺตํ อวธิ อเปกฺขิตํ สพฺพโลกสฺสาติ ฯ

ตตฺถ เอวนฺติ อนฺธพาเลน เอกราเชน วุตฺเต ฯ หนฺตีติ เทว กินฺนาเมตํ กเถสีติ วตฺวา หตฺถตเลหิ อตฺตานํ หนฺติ หนฺติ ฯ ปิสฺสามีติ ปิวิสฺสามิ ฯ อิเม เตปีติ อิเมปิ วสุลกุมารํ อาทึ กตฺวา เสสทารเก หตฺเถ คเหตฺวา รญฺโญ ปาทมูเล ฐิตา เอวมาห ฯ คุณิโนติ มาลาคุณาภรเณหิ สมนฺนาคตา ฯ กายูรธาริโนติ กายูรปสาธนธรา ฯ วิลสตนฺติ มหาราช มํ ฆาเตตฺวา โกฏฺฐาสสตํ กตฺวา ฯ สตฺตธาติ สตฺตสุ ฐาเนสุ ยญฺญํ ยชสฺสุ ฯ

อิติ สา รญฺโญ สนฺติเก อิมาหิ คาถาหิ ปริเทวิตฺวา อสฺสาสํ อลภมานา โพธิสตฺตสฺเสว สนฺติกํ คนฺตฺวา ปริเทวมานา อฏฺฐาสิ ฯ อถ นํ โส จนฺเท มยา ชีวมาเนน ตุยฺหํ ตสฺมึ ตสฺมึ วตฺถุสฺมึ สุภณิเต สุกถิเต อุจฺจาวจานิ มุตฺตาทีนิ พหูนิ อาภรณานิ ทินฺนานิ อชฺช ปน เต อิทํ ปจฺฉิมกํ ทานํ สรีรารุฬฺหนฺเต อาภรณํ ทมฺมิ คณฺหาหิ นนฺติ อาห ฯ