ตสฺมา น ยิฏฺเฐ น หุเต อรญฺชินฺติ ฯ

อิมา คาถา วตฺวา อตฺตโน สาวกภาวํ ปกาสนตฺถํ ตถาคตสฺส ปาทปิฏฺเฐ สีสํ ฐเปตฺวา สตฺถา เม ภนฺเต ภควา สาวโกหมสฺมีติ วตฺวา เอกตาลํ ทฺวิตาลํ ติตาลนฺติ ยาว สตฺตตาลปฺปมาณํ สตฺตกฺขตฺตุํ เวหาสํ อพฺภุคฺคนฺตฺวา โอรุยฺห ตถาคตํ วนฺทิตฺวา เอกมนฺตํ นิสีทิ ฯ ตํ ปาฏิหาริยํ ทิสฺวา มหาชโน อโห มหานุภาโว พุทฺโธ เอวํ ถามคตทิฏฺฐิโก นาม อตฺตานํ อรหาติ มญฺญมาโน อุรุเวลกสฺสโปปิ ทิฏฺฐิชาลํ ภินฺทิตฺวา ตถาคเตน ทมิโตติ สตฺถุ คุณกถญฺเญว กเถสิ ฯ

ตํ สุตฺวา ภควา อนจฺฉิริยํ อุปาสกา อิทานิ สพฺพญฺญุตญาณปฺปตฺเตน มยา อิมสฺส ทมนํ สฺวาหํ ปุพฺเพ สราคสโทสสโมหกาเลปิ นารโท นาม พฺรหฺมา หุตฺวา อิมสฺส ทิฏฺฐิชาลํ ภินฺทิตฺวา อิมํ นิพฺพิเสวนํ อกาสินฺติ วตฺวา ตุณฺหี อโหสิ ตาย ปริสาย ยาจิโต อตีตํ อาหริ ฯ

อตีเต วิเทหรฏฺเฐ มิถิลายํ องฺคติ นาม ราชา รชฺชํ กาเรสิ โส ธมฺมิโก ธมฺมราชา ฯ ตสฺส รุจา นาม ธีตา อโหสิ อภิรูปา ทสฺสนียา ปาสาทิกา กปฺปสตสหสฺสปตฺถิตปฺปตฺถนา มหาปุญฺญา ตสฺส อคฺคมเหสิยา กุจฺฉิมฺหิ นิพฺพตฺตา ฯ เสสา ปนสฺส โสฬสสหสฺสา อิตฺถิโย วญฺฌา อเหสุํ ฯ ตสฺส สา ธีตา ปิยา มนาปา อโหสิ ฯ โส ตสฺสา นานาปุปฺผปูเรหิ ปญฺจวีสติปุปฺผสมุเคหิ สทฺธึ อนคฺฆานิ อติสุขุมานิ จ วตฺถานิ อิเมหิ อตฺตานํ อลงฺกโรตูติ เทวสิกํ เทวสิกํ ปหิณิ ฯ ขาทนิยสฺส โภชนิยสฺส จ ปมาณํ นตฺถิ ฯ อนฺวฑฺฒมาสํ ทานํ เทตูติ สหสฺสํ เปเสสิ ฯ ตสฺส โข ปน วิชโย สุนาโม อลาโตติ ตโย อมจฺจา อเหสุํ ฯ โส โกมุทิยา จาตุมาสินิยา ปฐมฉเณ วตฺตมาเน เทวนคเร วิย นคเร จ อนฺเตปุเร จ อลงฺกเต สุนหาโต สุวิลิตฺโต สพฺพาลงฺการปฏิมณฺฑิโต ภุตฺตสายมาโส วิวฏสีหปญฺชเร มหาตเล นิสินฺโน อมจฺจคณปริวุโต วิสุทฺธํ คคณตลํ อภิลงฺฆมานํ จนฺทมณฺฑลํ ทิสฺวา อโห รมณียา วต โภ โทสินารตฺติ กาย นุขฺวชฺช รติยา อภิรเมยฺยามาติ อมจฺเจ ปุจฺฉิ ฯ