กถญฺจเร พลกายสฺมึ กถํ ชนปเท จเร

กถํ ธมฺมญฺจริตฺวาน ปจฺเจ คจฺฉนฺติ สุคตึ

กถญฺเจเก อธมฺมฏฺฐา ปตนฺติ นิรยํ อโธติ ฯ

ตตฺถ มุทุกา ภิสิยาติ มุทุกาย สุขสมฺผสฺสาย ภิสิยา ฯ มุทุจิตฺตกสณฺฐเตติ สุขสมฺผสฺเส จิตฺตตฺถรเณ ฯ มุทุปจฺจตฺถเตติ มุทุนา ปจฺจตฺถรเณน ปจฺจตฺถเต ฯ สมฺโมทีติ อาชีวเกน สทฺธึ สมฺโมทนียํ กถํ อกาสิ ฯ ตโตติ ตโต นิสชฺชนโต อนนฺตรเมว สาราณียํ กถํ กเถสีติ อตฺโถ ฯ กจฺจิ ยาปนียนฺติ กจฺจิ โว ภนฺเต สรีรํ ปณีตปจฺจเยหิ ยาเปตุํ สกฺกา ฯ วาตานมวิยตฺตตาติ กจฺจิ โว สรีเร วายุธาตุโย สมปฺปวตฺตา วาตานํ วิยตฺตตา นตฺถิ ฯ ตตฺถ ตตฺถ วคฺควคฺคา หุตฺวา วาตา น พาธนฺตีติ อตฺโถ ฯ อกสิราติ นิทฺทุกฺขา ฯ วุตฺตีติ ชีวิตวุตฺติ ฯ อปฺปาพาโธติ อิริยาปถภญฺชนเกน อาพาเธน วิรหิโต ฯ จกฺขูติ กจฺจิ โว จกฺขุอาทีนิ อินฺทฺริยานิ น ปริหายนฺตีติ ปุจฺฉิ ฯ ปฏิสมฺโมทีติ สมฺโมทนียกถาย ปฏิกเถสิ ฯ ตตฺถ สพฺพเมตนฺติ ยํ ตยา วุตฺตํ วาตานมวิยตฺตตาติ อาทิ สพฺพนฺตํ ตเถว ฯ ตทูภยนฺติ ยํ ตยา อปฺปาพาโธวสิ กจฺจิ จกฺขุ น ปริหายตีติ วุตฺตํ ตํปิ อุภยํ ตเถว ฯ น พลียเรติ นาภิภวนฺติ น กุปฺปนฺติ ฯ อนนฺตราติ ปฏิสนฺถารโต อนนฺตรา ปญฺหํ ปุจฺฉิ ฯ ตตฺถ อตฺถํ ธมฺมญฺจ ญายญฺจาติ ปาลีอตฺถญฺจ ปาลีธมฺมญฺจ การณยุตฺตญฺจ ฯ โส หิ กถํ ธมฺมญฺจเรติ ปุจฺฉนฺโต มาตาปิตุอาทีสุ ปฏิปตฺติทีปกํ ปาลีอตฺถญฺจ ปาลีธมฺมญฺจ การณยุตฺตญฺจ เม กเถถาติ อิมํ อตฺถญฺจ ธมฺมญฺจ ญายญฺจ ปุจฺฉิ ฯ ตตฺถ กถญฺเจเก อธมฺมฏฺฐาติ เอกจฺเจ อธมฺเม ฐิตา กถํ นิรยญฺเจว อโธสิรา อุทฺธปาทา อปาเย จ ปตนฺตีติ ฯ