ตตฺถ ภาวเสฏฺฐีติ เอวํ นามโก อสีติโกฏิวิภโว เสฏฺฐี ฯ คุเณรโตติ คุณมฺหิ รโต ฯ สมฺมโตติ สมฺภาวิโต ฯ สุจีติ สุจิกมฺโม ฯ อิธ ชาโต ทุริตฺถิยาติ อิมสฺมึ มิถิลนคเร ทุริตฺถิยา ทลิทฺทาย กปณาย กุมฺภทาสิยา กุจฺฉิมฺหิ ชาโตสฺมิ ฯ โส กิร ปุพฺเพ กสฺสปพุทฺธกาเล อรญฺเญ นฏฺฐํ พลิพทฺทํ คเวสมาโน เอเกน มคฺคมุฬฺเหน ภิกฺขุนา มคฺคํ ปุฏฺโฐ ตุณฺหี หุตฺวา ปุน เตน ปุจฺฉิโต กุชฺฌิตฺวา สมณทาสา นาเมเต มุขรา โหนฺติ ทาเสน ตยา ภวิตพฺพนฺติ อติมุขราสีติ อาห ฯ ตํ กมฺมํ ตทา วิปากํ อทตฺวา ภสฺมจฺฉนฺโน วิย ปาวโก ฐิตํ มรณสมเย อญฺญํ กมฺมํ อุปฏฺฐาสิ ฯ โส ยถา กมฺมํ สํสาเร สํสรนฺโต เอกสฺส กุสลกมฺมสฺส ผเลน สาเกเต วุตฺตปฺปกาโร เสฏฺฐี หุตฺวา ทานาทีนิ ปุญฺญานิ อกาสิ ฯ ตํ ปนสฺส กมฺมํ ปฐวิยํ นิหิตนิธิ วิย ฐิตํ โอกาสํ ลภิตฺวา วิปากํ ทสฺเสติ ฯ ยํ ปน เตน มคฺคมุฬฺหํ ภิกฺขุํ อกฺโกสนฺเตน กตํ ปาปกมฺมํ ตมสฺส ตสฺมึ อตฺตภาเว วิปากํ อทาสิ ฯ โส อชานนฺโต อิตรสฺส กลฺยาณกมฺมสฺส ผเลน กุมฺภทาสิยา กุจฺฉิมฺหิ นิพฺพตฺโตสฺมีติ สญฺญาย เอวมาห ฯ ยโต ชาโต สุทุคฺคโตติ สฺวาหํ ชาตกาลโต ปฏฺฐาย อติทุคฺคโตติ ทีเปติ ฯ สมจริยมธิฏฺฐิโตติ สมจริยายเมว ปติฏฺฐิโตมฺหิ ฯ นูเนตนฺติ เอกํเสเนตํ ฯ มญฺญิทํ สีลนฺติ เทว อิทํ สีลํ นาม นิรตฺถกํ มญฺเญ ฯ อลาโตติ ยถา อยํ อลาตเสนาปติ มยา ปุริมภเว พหุํ ปาณาติปาตปาปกมฺมํ กตฺวา เสนาปติฏฺฐานํ ลทฺธนฺติ ภาสติ เตน การเณนาหํ นิรตฺถกํ สีลนฺติ มญฺญามิ ฯ กลิเมวาติ ยถา อสิปฺโป อสิกฺขิโต อกฺขธุตฺโต ปราชยคฺคาหํ คณฺหติ ตถา นูน คณฺหามิ ปุริมภเว อตฺตโน สาปเตยฺยํ นาเสตฺวา อิทานิ ทุกฺขํ อนุภวามิ ฯ กสฺสปภาสิตนฺติ กสฺสปโคตฺตสฺส อเจลกสฺส ภาสิตํ สุตฺวาติ วทติ ฯ

วีชกสฺส วโจ สุตฺวา ราชาองฺคติมพฺรวิ

นตฺถิ ทฺวารํ สุคติยา นิยตํ กงฺข วีชก

สุขํ วา ยทิ วา ทุกฺขํ นิยตํ กิร ลพฺภติ