ตตฺถ ตโตติ ตโต รญฺโญ กามปงฺเก ลคฺคทิวสโต ปฏฺฐาย ฯ เทฺวสตฺตรตฺตสฺสาติ จุทฺทสเม ทิวเส ฯ ธาติมาตรมพฺรวีติ ปิตุ สนฺติกํ คนฺตุกามา หุตฺวา ธาติมาตโร อาห ฯ สา กิร จาตุทฺทเส นานาวณฺณานิ จ วตฺถานิ นิวาเสตฺวา ปญฺจกุมารีสตาหิ ปริวุตา ธาติคณํ อาทาย มหนฺเตน สิริวิลาเสน อตฺตโน สตฺตภูมิกา รติวฑฺฒนปาสาทา โอรุยฺห ปิตุ ทสฺสนตฺถํ จนฺทกปาสาทํ คจฺฉติ ฯ อถ นํ ปิตา ทิสฺวา ตุฏฺฐมานโส มหาสกฺการํ กาเรตฺวา อุยฺโยเชนฺโต อมฺม ทานํ เทหีติ สหสฺสํ ทตฺวา อุยฺโยเชสิ ฯ สา อตฺตโน นิเวสนํ คนฺตฺวา ปุน ทิวเส อุโปสถิกา หุตฺวา กปณทฺธิกวนิพฺพกยาจกานํ มหาทานํ เทติ ฯ รญฺญา กิรสฺสา เอโก ชนปโท ทินฺโน ฯ ตโต อาเยน สพฺพกิจฺจานิ กโรติ ฯ ตทา ปน รญฺญา กิร คุณาชีวกํ นิสฺสาย มิจฺฉาทสฺสนํ คหิตนฺติ สกลนคเร เอกโกลาหลมโหสิ ฯ ตํ รุจาย ธาติโย สุตฺวา ราชธีตาย อาโรจยึสุ อยฺเย ปิตรา กิร เต อาชีวกสฺส กถํ สุตฺวา มิจฺฉาทสฺสนํ คหิตํ โส กิร ราชา จตูสุ นครทฺวาเรสุ ทานสาลาโย วิทฺธํสาเปตฺวา ปรปริคฺคหิตา อิตฺถิโย จ กุมาริกาโย จ ปสยฺหากาเรน อาณาเปสิ รชฺชํ น วิจาเรสิ กามมทมตฺโตเยว ชาโตติ ฯ สา ตาสํ กถํ สุตฺวา อนตฺตมนา หุตฺวา กถํ หิ นาม เม ปิตา ตาทิสํ อปคตสุกฺกธมฺมํ นิลฺลชฺชํ นคฺคโภคํ คุณํ อุปสงฺกมิตฺวา ปญฺหํ ปุจฺฉติ นนุ ธมฺมิกสมณพฺราหฺมโณ กมฺมวาที อุปสงฺกมิตฺวา ปุจฺฉิตพฺโพ สิยา ฐเปตฺวา โข ปน มํ อญฺโญ มยฺหํ ปิตรํ มิจฺฉาทสฺสนา โมเจตฺวา สมฺมาทสฺสเน ปติฏฺฐเปตุํ สมตฺโถ นาม นตฺถิ อหมฺหิ อตีตา สตฺต อนาคตา สตฺตาติ จุทฺทสชาติโย สรามิ ตสฺมา ปุพฺเพ อตฺตนา กตํ ปาปกมฺมํ กเถตฺวา ปาปกมฺมสฺส ผลํ ทสฺเสตฺวา มม ปิตรํ โพเธสฺสามิ สเจ ปน อชฺเชว คมิสฺสามิ อถ มม ปิตา มํ อมฺม ตฺวํ ปุพฺเพ อฑฺฒมาสํ อาคจฺฉสิ อชฺช กสฺมา ลหุํ อาคตาสีติ วกฺขติ ตตฺร เจ อหํ ตุมฺเหหิ กิร มิจฺฉาทสฺสนํ คหิตนฺติ สุตฺวา อาคตมฺหีติ วกฺขามิ น เม วจนํ ครุกํ กตฺวา คณฺหิสฺสติ ตสฺมา อชฺช อคนฺตฺวา อิโต จุทฺทสเม ทิวเส กาฬปกฺเข จาตุทฺทเสเยว กิญฺจิ อชานนฺตี วิย ปุพฺเพ คมนากาเรเนว คนฺตฺวา อาคมนกาเล ทานวตฺตตฺถาย สหสฺสํ ยาจิสฺสามิ ตทา เม ปิตา ทิฏฺฐิยา คหิตภาวํ กเถสฺสติ อถ นํ อหํ อตฺตโน พเลน มิจฺฉาทิฏฺฐึ ฉฑฺฑาเปสฺสามีติ จินฺเตสิ ฯ ตสฺมา จุทฺทสเม ทิวเส ปิตุ สนฺติกํ คนฺตุกามา หุตฺวา เอวมาห ฯ ตตฺถ สขิโย จาติ สหายิกาโยปิ เม ปญฺจสตา กุมาริกาโย เอกาเยกํ อสทิสํ กตฺวา สพฺพา นานาลงฺกาเรหิ นานาวณฺเณหิ ปุปฺผคนฺธวิเลปเนหิ อลงฺกโรนฺตุ ฯ ทิพฺโยติ ทิพฺพทิวโส ฯ เทวตาสนฺนิปาตปฏิมณฺฑิโตติปิ ทิพฺโพ ฯ คจฺฉนฺติ มม ทานวตฺตํ อาหราเปตุํ วิเทหราชสฺส ปิตุ สนฺติกํ คมิสฺสามิ ฯ อภิหรึสูติ โสฬสหิ คนฺโธทกฆเฏหิ นหาเปตฺวา มณฺเฑตฺวา กุมาริกานํ มณฺฑนตฺถาย กิร อภิหรึสุ ฯ ปริกีริยาติ ปริวาเรตฺวา ฯ อโสภึสูติ จํรุ ปริวาเรตฺวา ราชธีตรํ เทวกญฺญา วิย ตํ ทิวสํ อติวิย โสภึสุ ฯ