พหุํ วินาสิตวิตฺตํ นิรตฺถํ อผลํ ตยา

อุโปสเถว ยํ นิจฺจํ อนฺนปานํ น ภุญฺชสิ

นิยเตตํ อภุตฺตพฺพํ นตฺถิ ปุญฺญํ อภุญฺชโตติ ฯ

ตตฺถ องฺคติมพฺรวีติ ภิกฺขเว โส องฺคติ ราชา ปุพฺเพ อยาจิโตปิ อมฺม ทานํ เทหีติ สหสฺสํ ทตฺวา ตํ ทิวสํ ยาจิโตปิ มิจฺฉาทสฺสนสฺส คหิตตฺตา อทตฺวา อิทํ พหุํ วินาสิตนฺติ อาทิวจนมพฺรวิ ฯ นิยเตตํ อภุตฺตพฺพนฺติ เอตํ นิยตวเสน ตยา อภุญฺชิตพฺพํ ภวิสฺสติ ภุญฺชนฺตานํปิ อภุญฺชนฺตานํปิ นตฺถิ ปุญฺญํ สพฺเพหิ จุฬาสีติมหากปฺเป อนติกฺกมิตฺวาว สุชฺฌิตพฺพนฺติ ฯ