รตฺตินฺทิโว จ โส ทิพฺโย มานุสึ สรโทสตํ

อิติ กมฺมานิ อนฺเวนฺติ อสํเขยฺยาปิ ชาติโย

กลฺยาณํ ยทิวา ปาปํ น หิ กมฺมํ วินสฺสตีติ ฯ

ตตฺถ ทสนฺเนสูติ ทสนฺนรฏฺเฐ ฯ ปสูติ โคโณ ฯ อหุนฺติ อโหสึ ฯ นิลุจฺฉิโตติ วจฺฉกกาเลเยว มํ เอวํ มนาโป ภวิสฺสตีติ นิพฺพีชมกํสุ ฯ โสหํ นิลุจฺฉิโต อุทฺธตวีโชว ชโว ภโทฺร อโหสึ ฯ วชฺชีสุ กุลมาคโตติ โคโยนิโต จวิตฺวา วชฺชีรฏฺเฐ เอกสฺมึ มหาโภคกุเล นิพฺพตฺตมฺหีติ ทสฺเสติ ฯ เนวิตฺถี น ปุมาติ นปุํสกตฺตํ สนฺธายาห ฯ ภวเน ตาวตึสาหนฺติ ตาวตึสภวเน อหํ ฯ ตตฺถ ฐิตาหํ เวเทห สรามิ ชาติโย อิมาติ สา กิร ตสฺมึ เทวโลเก ฐิตา อหํ เอวรูปํ เทวโลกํ อาคจฺฉนฺตี กุโต นุ โข อาคตาติ โอโลเกนฺตี วชฺชีรฏฺเฐ มหาโภคกุเล นปุํสกตฺตภาวโต จวิตฺวา ตตฺถ นิพฺพตฺตภาวํ ปสฺสิ ฯ ตโต เกน นุ โข กมฺเมน เอวรูเป รมณียฏฺฐาเน นิพฺพตฺตมฺหีติ โอโลเกนฺตี โกสมฺพิยํ เสฏฺฐิกุเล นิพฺพตฺติตฺวา กตทานาทีนิ กุสลานิ ทิสฺวา เอตสฺส ผเลน นิพฺพตฺตมฺหีติ ญตฺวา อนนฺตราตีเต นปุํสกตฺตภาเว นิพฺพตฺตมานา กุโต อาคตมฺหีติ โอโลเกนฺตี ทสนฺนรฏฺเฐสุ โคโยนิยํ มหาทุกฺขสฺส อนุภูตภาวํ อญฺญาสิ ฯ ตโต อนนฺตรํ ชาตึ อนุสฺสรมานา วานรโยนิยํ อุทฺธตผลภาวํ อทฺทส ฯ ตโต อนนฺตรํ อนุสฺสรนฺตี ภินฺนาคกรฏฺเฐ ฉกลโยนิยํ อุทฺธตวีชภาวํ อนุสฺสริ ฯ ตโต อนนฺตรํ อนุสฺสรมานา โรรุเว นิพฺพตฺตภาวํ อนุสฺสริ ฯ อถสฺสา นิรเย ปจนภาวญฺจ ติรจฺฉานโยนิยํ อนุภูตํ ทุกฺขญฺจ อนุสฺสรนฺติยา ภยํ อุปฺปชฺชิ ฯ ตโต เกน นุ โข กมฺเมน เอวรูปํ ทุกฺขํ อนุภูตํ มยาติ ฉฏฺฐํ ชาตึ โอโลเกนฺตี ตาย ชาติยา โกสมฺพินคเร กตกลฺยาณกมฺมํ ทิสฺวา สตฺตมํ โอโลเกนฺตี มคธรฏฺเฐ ปาปสหายํ นิสฺสาย กตปรทารกมฺมํ ทิสฺวา เอตสฺส ผเลน ตํ เม มหาทุกฺขํ อนุภูตนฺติ อญฺญาสิ ฯ อถาหํ อิโต จวิตฺวา อนาคเต กุหึ นิพฺพตฺติสฺสามีติ โอโลเกนฺตี ยาวตายุกํ ฐตฺวา ปุน สกฺกสฺเสว ปริจาริกา หุตฺวา นิพฺพตฺติสฺสามีติ อญฺญาสิ ฯ เอวํ ปุนปฺปุนํ โอโลกิยมานา ตติเยปิ อตฺตภาเว สกฺกสฺเสว ปริจาริกา หุตฺวา นิพฺพตฺติสฺสามีติ ฯ ตถา จตุตฺเถ ปญฺจเม ปน ตสฺมึเยว เทวโลเก ชวนเทวปุตฺตสฺส อคฺคมเหสี หุตฺวา นิพฺพตฺติสฺสามีติ ญตฺวา ตโต อนนฺตรํ โอโลเกนฺตี ฉฏฺเฐ อตฺตภาเว อิโต ตาวตึสภวนโต จวิตฺวา องฺคติรญฺโญ อคฺคมเหสิยา กุจฺฉิสฺมึ นิพฺพตฺติสฺสามิ รุจาติ เม นามํ ภวิสฺสตีติ ญตฺวา ตโต อนนฺตรํ กุหึ นิพฺพตฺติสฺสามีติ โอโลเกนฺตี สตฺตมาย ชาติยา ตโต จวิตฺวา ตาวตึสภวเน มหิทฺธิโก เทวปุตฺโต หุตฺวา นิพฺพตฺติสฺสามิ อิตฺถีภาวโต มุญฺจิสฺสามีติ อญฺญาสิ ฯ ตสฺมา อาห ตตฺถ ฐิตาหํ เวเทห สรามิ สตฺต ชาติโย อนาคเตปิ สตฺเตว ยา คมิสฺสํ อิโต จุตาติ ฯ ปริยาคตนฺติ ปริยาเยน อตฺตโน วาเรน อาคตํ ฯ สตฺต ชจฺจาติ วชฺชีรฏฺเฐ นปุํสกชาติยา สทฺธึ เทวโลเก ปญฺจ อยญฺจ ฉฏฺฐาติ สตฺต ชาติโย วุจฺจนฺติ ฯ เอตา สตฺต ชาติโย นิจฺจํ สกฺกตปูชิตา อโหสินฺติ ทสฺเสติ ฯ ฉฏฺฐาว คติโยติ เทวโลเก ปญฺจ อยญฺจ เอกาติ อิมา ฉ คติโย อิตฺถีภาวา น มุญฺจิสฺสนฺติ วทติ ฯ สตฺตมี จาติ ตโต จวิตฺวา อนนฺตรํ ฯ สนฺตานมยนฺติ เอกโต วณฺฏิกาทิวเสน กตสนฺตานํ คนฺเถนฺติ ยถา สนฺตานมยา โหนฺติ ฯ เอวํ อชฺชาปิ มม ปริจาริกาโย นนฺทนวเน เม จุติภาวํ อชานนฺตา มมตฺถาย มาลํ คนฺเถนฺติเยว ฯ โส เม มาลํ ปฏิจฺฉตีติ มหาราช อนนฺตรชาติยา มม สามิโก ชโว นาม เทวปุตฺโต โย รุกฺขโต ปาติตํ มาลํ ปฏิจฺฉติ ฯ โสฬสาติ มหาราช มม ชาติยา อิทานิ โสฬสวสฺสานิ เอตฺตโก ปน กาโล เทวานํ เอโก มุหุตฺโต วิย ฯ เตน ตา ปน มม จุติภาวํปิ อชานนฺตา มมตฺถาย มาลํ คนฺเถนฺติเยว ฯ มานุสินฺติ มนุสฺสานํ วสฺสคณนํ อาคมฺม ฯ สรโทสตนฺติ วสฺสสตํ โหติ ฯ เอวํ ทีฆายุกา เทวา อิมินา การเณน ปรโลกสฺส จ กลฺยาณปาปกานญฺจ กมฺมานํ อตฺถิตํ ชานาหิ เทวาติ ฯ อนฺเวนฺตีติ ยถา มํ อนุพนฺธึสุ เอวํ อนุพนฺธนฺติ ฯ น หิ กมฺมํ วินสฺสตีติ ทิฏฺฐธมฺมเวทนียํ ตสฺมึเยว อตฺตภาเว อุปปชฺชเวทนียํ อนนฺตรตฺตภาเว วิปากํ เทติ อปราปร เวทนียํ ปน วิปากํ อทตฺวา น นสฺสติ ฯ ตํ สนฺธาย น หิ กมฺมํ วินสฺสตีติ วตฺวา เทว อหํ ปรทารกมฺมสฺส นิสฺสนฺเทน นิรเย ปจิตฺวา ติรจฺฉานโยนิยญฺจ มหนฺตํ ทุกฺขํ อนุภวึ สเจ ตุมฺเหปิ อิทานิ คุณสฺส กถํ คเหตฺวา เอวํ กริสฺสถ มยา อนุภูตสทิสเมว ทุกฺขํ อนุภวิสฺสถ ตสฺมา มา เอวํ อกริตฺถาติ อาห ฯ