มุฬฺหสฺส มคฺคมาจิกฺขิ ธมฺมมกฺขาสิ สุพฺพตาติ ฯ

ตตฺถ อิจฺเจวนฺติ ภิกฺขเว อิติ อิเมหิ เอวรูเปหิ มธุรวจเนหิ สา ราชกญฺญา ปิตรํ โตเสติ ฯ มุฬหสฺส มคฺคํ วิย ตสฺส สุคติมคฺคํ อาจิกฺขิ ฯ นานานเยหิ สุจริตธมฺมํ อกฺขาสิ ธมฺมํ กเถนฺตี เยว จสฺส ฯ สุพฺพตาติ สุนฺทรวตา ฯ

สา อตฺตโน อตีตชาติโยปิสฺส กเถสิ ฯ เอวํ ปุพฺพณฺหโต ปฏฺฐาย สพฺพรตฺตึ ปิตุ ธมฺมํ เทเสตฺวา เทว มา นคฺคสฺส มิจฺฉาทิฏฺฐิกสฺส วจนํ คณฺหิ อตฺถิ อยํ โลโก อตฺถิ ปรโลโก อตฺถิ สมณพฺราหฺมณา อตฺถิ สุกตทุกฺกฏานํ กมฺมานํ ผลนฺติ วทนฺตสฺส มาทิสสฺส กลฺยาณมิตฺตสฺส วจนํ คณฺห มา อติตฺเถ ปกฺขนฺทาติ อาห ฯ เอวํ สนฺเตปิ ปิตรํ มิจฺฉาทสฺสนา โมเจตุํ นาสกฺขิ ฯ โส หิ เกวลํ ตสฺสา มธุรวจนํ สุตฺวา ตุสิ ฯ มาตาปิตโร หิ ปิยปุตฺตานํ วจนํ ปิยายนฺติ ฯ น ปน ตํ มิจฺฉาทสฺสนํ วิสชฺเชติ ฯ นคเรปิ รุจา กิร ราชธีตา ปิตุ ธมฺมํ เทเสตฺวา มิจฺฉาทสฺสนํ วิสชฺชาเปตีติ เอกโกลาหลมโหสิ ฯ ปณฺฑิตา ราชธีตา อชฺช ปิตรํ มิจฺฉาทสฺสนา โมเจสตฺวา นครวาสีนํ โสตฺถิภาวํ กริสฺสตีติ มหาชโน ตุสิ ฯ สา ปิตรํ โพเธตุํ อสกฺโกนฺตี วิริยํ อวิสชฺเชตฺวาว เยน เกนจิ อุปาเยน ปิตุ โสตฺถิภาวํ กริสฺสามีติ สิรสิ อญฺชสึ ปติฏฺฐเปตฺวา ทส ทิสา นมสฺสิตฺวา อิมสฺมึ โลเก โลกสนฺธารกา ธมฺมิกสมณพฺราหฺมณา นาม โลกปาลา เทวตา นาม มหาพฺรหฺมาโน นาม อตฺถิ เต อาคนฺตฺวา อตฺตโน พเลน มม ปิตรํ มิจฺฉาทสฺสนํ วิสชฺชาเปนฺตุ เอตสฺส ปิตุโน คุเณ อสติ มม คุเณน มม พเลน มม สจฺเจน อาคนฺตฺวา อิมํ มิจฺฉาทสฺสนํ วิสชฺชาเปตฺวา สกลโลกสฺส โสตฺถิภาวํ กโรนฺตูติ อธิฏฺฐหิตฺวา นมสฺสิ ฯ

ตทา โพธิสตฺโต นารโท นาม มหาพฺรหฺมา อโหสิ ฯ โพธิสตฺโต จ นาม อตฺตโน เมตฺตาภาวนาย อนุทยาย มหนฺตภาเวน สุปฏิปนฺนทุปฺปฏิปนฺเน สตฺเต ทสฺสนตฺถํ กาลานุกาลํ โลกํ โอโลเกนฺโต วิจรติ ฯ โส ตํ ทิวสํ โลกํ โวโลเกนฺโตเยว ตํ ราชธีตรํ ปิตุ มิจฺฉาทิฏฺฐิวิโมจนตฺถํ โลกสนฺธารกเทวตาโย นมสฺสมานํ ทิสฺวา ฐเปตฺวา มํ อญฺโญ เอตํ ราชานํ มิจฺฉาทสฺสนํ วิสชฺชาเปตุํ สมตฺโถ นาม นตฺถิ อชฺช มยา ราชธีตุ สงฺคหํ รญฺโญ จ สปริชนสฺส โสตฺถิภาวํ กตฺวา อาคนฺตุํ วฏฺฏติ เกน นุโข เวเสน คมิสฺสามีติ จินฺเตตฺวา มนุสฺสานํ ปพฺพชิตา ปิยา เจว ครุกา จ อาเทยฺยวจนา จ ตสฺมา ปพฺพชิตเวเสน คมิสฺสามีติ สนฺนิฏฺฐานํ กตฺวา ปาสาทิกํ สุวณฺณวณฺณํ มนุสฺสตฺตภาวํ มาเปตฺวา มนุญฺญํ ชฏามณฺฑลํ พนฺธิตฺวา ชฏนฺตเร กาญฺจนสูจึ โอทหิตฺวา อนฺโต รตฺตปฏํ อุปริ รตฺตวากจิรํ นิวาเสตฺวา สุวณฺณตารขจิตํ รชตมยํ อชินจมฺมํ เอกํสํ กตฺวา มุตฺตาสิกฺกาย ปกฺขิตฺตํ สุวณฺณมยํ ภิกฺขาภาชนํ ตีสุ ฐาเนสุ วงฺกํ สุวณฺณกาชํ ขนฺเธ กตฺวา มุตฺตาสิกฺกาย เอกํ ปวาฬมยํ กมณฺฑลุํ อาทาย อิมินา อิสิเวเสน คคณตเล จนฺโท วิย วิโรจมาโน อากาเสนาคนฺตฺวา อลงฺกตจนฺทกปาสาทมหาตลํ ปวิสิตฺวา รญฺโญ ปุรโต อฏฺฐาสิ ฯ