ตญฺจ ทิสฺวา อนุปฺปตฺตํ รุจา อิสิมวนฺทถาติ ฯ

ตตฺถ อทฺทสาติ พฺรหฺมโลเก ฐิโตว ชมฺพูทีปํ อเปกฺขนฺโต คุณาชีวกสฺส สนฺติเก คหิตมิจฺฉาทสฺสนํ ราชานํ องฺคตึ อทฺทส ฯ ตสฺมา อาคโตติ อตฺโถ ฯ ตโต ปติฏฺฐาติ ตโต โส พฺรหฺมา ตสฺส รญฺโญ อมจฺจคณปริวุตสฺส นิสินฺนสฺส ปุรโต ตสฺมึ ปาสาเท อปเท ปทํ ทสฺเสนฺโต อากาเส ปติฏฺฐหิ ฯ อนุปฺปตฺตนฺติ ปตฺตํ อาคตํ ฯ อิสินฺติ อิสิเวเสนาคตตฺตา สตฺถา อิสินฺติ อาห ฯ อวนฺทถาติ สา มมานุคฺคเหน มม ปิตริ การุญฺญํ กตฺวา เอโส เทวราชา อาคโต ภวิสฺสตีติ ตุฏฺฐปหฏฺฐา วาตาภิหตา สุวณฺณกทฺทลี วิย โอนมิตฺวา นารทํ มหาพฺรหฺมานํ วนฺทิ ฯ

ราชาปิ ตํ ทิสฺวาว พฺรหฺมเตเชน ตชฺชิโต อตฺตโน อาสเน สณฺฐาตุํ อสกฺโกนฺโต อาสนา โอรุยฺห ภูมิยํ ฐตฺวา อาคตฏฺฐานญฺจ นามโคตฺตญฺจ ปุจฺฉิ ฯ

ตมตฺถํ ปกาเสนฺโต สตฺถา อาห