สา เนว รตฺติ น ทิวา ปญฺญายติ

ตถาวิเธ โก วิจเร ธนตฺถิโกติ ฯ

ตตฺถ อนฺธตมนฺติ มหาราช ยมฺหิ โลกนฺตนิรเย มิจฺฉาทิฏฺฐิกา นิพฺพตฺตนฺติ ตตฺถ จกฺขุวิญฺญาณสฺส อุปฺปตฺตินิวารณํ อนฺธตมํ ฯ สทา ตุมุโลติ โส นิรโย นิจฺจํ พหลนฺธกาโร ฯ โฆรรูโปติ ภึสนกรูโป ภึสนกชาติโก ฯ สา เนว รตฺติ น ทิวาติ สา อิธ รตฺติ วา ทิวโส วา เนว ตตฺถ ปญฺญายติ ฯ โก วิจเรติ โก อุฏฺฐานวิริยํ สาเธนฺโต วิจริสฺสติ ฯ

ตํ ปิสฺส โลกนฺตนิรยํ วิตฺถาเรน วณฺเณตฺวา มหาราช สเจ ตฺวํ มิจฺฉาทิฏฺฐึ อวิสฺสชฺเชนฺโต น เกวลํ เอตเทว อญฺญมฺปิ ทุกฺขํ อนุภวิสฺสสีติ ทสฺเสนฺโต อิมํ คาถมาห