ชิณฺณํ โปสํ ควสฺสญฺจ มาสฺสุ ยุญฺช ยถา ปุเร

ปริหารญฺจ ทชฺชาสิ อธิการกโต พลีติ ฯ

ตตฺถ เอเต จาติ ยถา เอเต ธตรฏฺโฐ เวสฺสามิตฺโต อฏฺฐโก ยมทตฺติ อุสินฺนโร สิวิราชาติ ฉ ราชาโน อญฺเญ จ ธมฺมํ จริตฺวา สกฺกวิสยํ คตา เอวํ ตฺวํปิ อธมฺมํ ปริวชฺเชตฺวา ธมฺมญฺจร ฯ โก ฉาโตติ มหาราช ตว พฺยมฺเห จ ปุเร จ ราชนิเวสเน เจว นคเร จ อนฺนหตฺถา ปุริสา โก ฉาโต โก ตสิโตติ เตสํ ทาตุกามตาย โฆเสนฺตุ ฯ โก มาลนฺติ โก มาลํ อิจฺฉติ โก วิเลปนํ อิจฺฉติ นานารตฺตานํ วตฺถานํ ยํ ยํ อิจฺฉติ ตํ ตํ ททนฺตุ โก นคฺโค ปริทหิสฺสตีติ โฆเสนฺตุ ฯ โก ปนฺเถ ฉตฺตมาเทตีติ โก ปนฺเถ ฉตฺตมาทิยติ ฯ ปาทุกา จาติ อุปาหนา จ มุทุ สุภา โก อิจฺฉติ ฯ

เยปิ เต ควสฺสาทโย ชิณฺณกาเล กมฺมํ กาตุํ น สกฺโกนฺติ ฯ เตสุ เอกํปิ ปุพฺเพ วิย กมฺเมสุ มา โยชยิ ฯ ชิณฺณกาลสฺมึ หิ เต ตานิกมฺมานิ กาตุํ น สกฺโกนฺติ ฯ ปริหารญฺจาติ อิธ ปริหาโร สกฺกาโรติ วุตฺโต ฯ อิทํ วุตฺตํ โหติ โย จ เต พลี หุตฺวา อธิการกโต ปุพฺเพ กตูปกาโร โหติ ตสฺส ยถาโปราณํ ปริหารํ ทเทยฺยาสิ ฯ อสปฺปุริสา หิ อตฺตโน อุปการํ กาตุํ สมตฺถกาเลเยว สมฺมานํ กโรนฺติ อสมตฺถกาเล น ตํ โอโลเกนฺติ สปฺปุริสา ปน สมตฺถกาเลปิ อสมตฺถกาเลปิ เตสํ ตเถว สกฺการํ กโรนฺติ ตสฺมา ตฺวํปิ เอวํ กเรยฺยาสีติ ฯ