ตํ เว นรํ สมณมาหุ โลเกติ ฯ

ตตฺถ ขิฑฺฑนฺติ กายิกวาจสิกขิฑฺฑํ ฯ รตินฺติ ทิพฺพกามคุณรตึ ฯ กิญฺจีติ อปฺปมตฺตกํปิ ฯ วิภูสนฏฺฐานาติ มํสวิภูสา จ ฉวิวิภูสา จ เทฺว วิภูสา ตตฺถ อชฺโฌหรณิยาหาโร มํสวิภูสา นาม มาลาคนฺธาทีนิ ฉวิวิภูสา นาม เยน อกุสลจิตฺเตน สาทิยติ ตนฺตสฺส ฐานํ ตโต ปฏิวิรโต ฯ เมถุนสฺมาติ เมถุนเสวนโต จ โย ปฏิวิรโต ฯ ตํ เว นรํ สมณมาหุ โลเกติ อหํ ปน อชฺช เทวจฺฉรา ปหาย อิธาคนฺตฺวา สมณธมฺมํ กโรมิ ตสฺมา มม สีลํ มหนฺตนฺติ ฯ

เอวํ สกฺโกปิ อตฺตโน สีลเมว วณฺเณติ ฯ

ตํ สุตฺวา ธนญฺชยราชา อหํ อชฺช มหนฺตํ ปริคฺคหํ โสฬสสหสฺสาหิ นาฏกิตฺถีหิ ปริปุณฺณํ อนฺเตปุรํ ปริจฺจชิตฺวา อุยฺยาเน สมณธมฺมํ กโรมิ ตสฺมา มม สีลํ มหนฺตนฺติ วตฺวา อิมํ คาถมาห