ตตฺถ ปริคฺคหนฺติ นานปฺปการํ วตฺถุกามํ ฯ โลภธมฺมนฺติ ตสฺมึ อุปฺปชฺชนตณฺหํ ฯ ปริญฺญายาติ ญาตปริญฺญา ตีรณปริญฺญา ปหานปริญฺญาติ อิมาหิ ตีหิ ปริญฺญาหิ ปริชานิตฺวา ตตฺถ ขนฺธาทีนํ สภาวชานนํ ญาตปริญฺญา นาม ขนฺเธสุ อคุณํ อุปธาเรตฺวา ตีรณํ ติรณปริญฺญา นาม เตสุ โทสํ ทิสฺวา ฉนฺทราคสฺสาปกฑฺฒนํ ปหานปริญฺญา นาม เย อิมาหิ ตีหิ ปริญฺญาหิ ปริชานิตฺวา วตฺถุกามกิเลสกาเม ปริจฺจชนฺติ ฉฑฺเฑตฺวา คจฺฉนฺติ ฯ ทนฺตนฺติ นิพฺพิเสวนํ ฐิตตฺตนฺติ มิจฺฉาวิตกฺกาภาเวน ฐิตสภาวํ ฯ อมมนฺติ มมายนตณฺหาย วิรหิตํ ฯ นิราสนฺติ ปุตฺตทาราทีหิ นิราสจิตฺตํ ฯ ตํ เว นรนฺติ ตํ เอวรูปํ ปุคฺคลํ สมณนฺติ วทนฺติ ฯ

อิติ เต สพฺเพปิ อตฺตโน อตฺตโน สีลเมว มหนฺตนฺติ วณฺเณตฺวา ธนญฺชยํ ปุจฺฉึสุ มหาราช อตฺถิ ปน โกจิ ตุมฺหากํ สนฺติเก ปณฺฑิโต โย โน อิมํ กงฺขํ วิโนเทยฺยาติ ฯ อาม มหาราช มม อตฺถธมฺมานุสาสโก อสมธุโร วิธุรปณฺฑิโต นาม อตฺถิ โส โน กํขํ วิโนเทสฺสติ ตสฺส สนฺติกํ คจฺฉามาติ ฯ เต สาธูติ สมฺปฏิจฺฉึสุ ฯ อถ สพฺเพ เต อุยฺยานา นิกฺขมิตฺวา ธมฺมสภายํ คนฺตฺวา ธมฺมาสนํ อลงฺการาเปตฺวา โพธิสตฺตํ ปลฺลงฺกวรมชฺเฌ นิสีทาเปตฺวา ปฏิสนฺถารํ กตฺวา เอกมนฺตํ นิสินฺนาว ปณฺฑิต อมฺหากํ กงฺขา อุปฺปนฺนา ตํ วิโนเทหีติ วตฺวา อิมํ คาถมาหํสุ

ปุจฺฉาม กตฺตารมโนมปญฺญํ

กถาสุ โน วิคฺคโห อตฺถิ ชาโต